Osynyń saldarynan jaqynda Borodýlıha aýdanynda dárigerler aýyryp qalǵan balaǵa jedel járdem kóligimen emes, traktormen barýǵa májbúr boldy. «Jańa Shúlbi aýylynda kishkentaı bala dem ala almaı, entigip jatyr degen habar kelip tústi. Shuǵyl medısınalyq kómek qajet edi. Aýa raıynyń qolaısyzdyǵyna baılanysty jedel járdem kóligi jolǵa shyǵa almady. Osy sátte «Lazarev» JShS-niń júrgizýshisi Ivan Poznıak traktorymen kómekke keldi» dep jazady Semeı jedel medısınalyq kómek beketiniń baspasóz qyzmeti.
Osy aýyldyń turǵyny Krıstına Belender áleýmettik jeli arqyly aq qar, kók muzǵa qaramastan traktorǵa otyryp, kómek kórsetýge asyqqan feldsher Olga Chýkýrova men traktorshy Ivan Poznıakke alǵysyn jetkizdi. «Qoǵamda dál osyndaı meıirimdi hám janashyr jandar kóp bolsa deımin. Olarǵa myń alǵys» deıdi aýyl turǵyny.
Shyǵys Qazaqstan oblysy,
Borodýlıha aýdany,
Jańa Shúlbi aýyly
