Syrtqy ister mınıstrliginiń málimeti boıynsha, búginde Ýhan qalasynda 98 qazaqstandyq stýdent bar. Jandarbek Bekshın olardyń 61-i arnaıy bortpen elge jetkiziletinin jáne olar eki apta boıy karantındik stasıonarǵa ornalastyrylatynyn aıtty. «Premer-Mınıstrdiń keńsesinde ótken brıfıngte bizdiń Úkimet Qytaı Halyq Respýblıkasy úkimetine Ýhannan 61 stýdentti alyp kelýdi uıymdastyrýǵa nıetin bildirdi. Qytaıǵa arnaıy bortpen baratyn bizdiń dárigerler qorǵanys kostıýmderimen, maskalarmen jabdyqtalady. Bort kelgennen keıin de dezınfeksııadan ótedi. Stýdentter 14 kúndik karantındik stasıonarǵa ornalastyrylady. Qazir Qytaı tarapynan bizdiń ushaqtyń ushýy týraly kelisim kútýdemiz. Týrıster men issaparda júrgenderdi qaıtarýymyz kerek. Sondyqtan qazirgi tańda shekarany jabý múmkin emes», dedi ol.
Bas sanıtarlyq dárigerdiń aıtýynsha, elimizde maskalar, arnaıy kostıýmder, dáriler barlyǵy jetkilikti. Sondaı-aq otandyq óndirýshilerge dáke tańǵyshtaryn jappaı óndirýge tapsyrys ta berilgen.
Sondaı-aq ol koronavırýstyń alǵashqy belgileri jedel respıratorlyq vırýstyq ınfeksııamen (JRVI/ORVI) jáne tumaýmen uqsas bolatynyn atap ótti. «Jańa vırýstyń taralýy bizde jyl saıyn bolatyn maýsymdyq jedel respıratorlyq-vırýstyq ınfeksııanyń, tumaýdyń órshý kezeńimen tuspa-tus kelip otyr. Úsheýiniń de alǵashqy belgileri birdeı. Búgin saǵat 11-degi aqparat boıynsha, elimizde 4 naýqas aýrýhanaǵa jatqyzyldy. Almaty qalasyndaǵy eki naýqas medısınalyq kómek alǵannan keıin, úılerine qaıtty. Atyraý oblysy Qyzylqoǵa aýdanyndaǵy bir naýqas ta ORVI dıagnozy boıynsha em qabyldaýda. Búgin tańerteń Nur-Sultanǵa Beıjiń qalasynan kelgen 16 jastaǵy oqýshy balalar ınfeksııasy aýrýhanasyna jatqyzyldy. Oǵan da bizdiń ınfeksıonıst keńesshiler osy dıagnozdy qoıdy. Tústen keıin Haınanda demalysta bolǵan aqmolalyq bir otbasy keldi. Eki balasynyń qyzýynyń kóterilýine baılanysty barlyq otbasy aýrýhanaǵa jatqyzyldy», dedi J.Bekshın.
Densaýlyq saqtaý mınıstrligi 6 qańtardan bastap Qytaıdan kelgen barlyq sheteldik azamattarmen baılanys ornatqan. Olarmen jergilikti medısına qyzmetkerleri tikeleı baılanysta. Osyny aıtqan Jandarbek Bekshın Qytaıdan kelgen barlyq kisilerdiń emhanalarǵa ózdiginen baryp esepke turýy kerek ekenin jetkizdi.
Sondaı-aq ol aýrý belgileri baıqalǵan kisilerdiń qan synamalary birden arnaıy zerthanaǵa jiberilip, úsh kún ishinde anyqtalatynyn atap ótti. «Anyqtaý qıynǵa soqqan jaǵdaıda ózimizdiń algorıtmimiz boıynsha Dúnıejúzilik densaýlyq saqtaý uıymynyń bekitilgen zerthanasyna synamalardy jiberemiz. Búginde bıotehnologııa ǵalymdarymen birlesip, elimiz boıynsha Almaty men Nur-Sultan qalalarynda otandyq arnaıy dıagnostıka ortalyǵy jasaqtalýda. Sondaı-aq biz Reseı Federasııasyndaǵy áriptestermen kelisimge keldik. Kerek kezde synamalardy Máskeýge jáne Novosibir qalasyna jiberemiz. 30 qańtarǵa deıin ózimizdiń dıagnostıkalyq zattardy ázirlep shyǵýǵa múmkindigimiz bar. Biz aldyn alý sharalarynyń barlyǵyn júrgizip jatyrmyz», dedi J.Bekshın.
