«Barys Arenada» tórt komanda ózara kúsh synasady. Atap aıtsaq, jolymyz Ýkraına, Nıderland jáne Polsha quramalarymen qıysady. Osylardan ozǵan jaǵdaıda ǵana bizdiń jigitter Olımpıada joldamasy úshin jarysty jalǵastyrady. Sol maqsatqa qol jetkizý úshin Andreı Skabelkanyń shákirtteri esh aıanyp qalmasy anyq jáne de ol jospardy júzege asyrýǵa tolyq múmkindigimiz bar. Olaı deýge negiz, úzdikter tiziminde joǵaryda atalǵan komandalardyń barlyǵynan jerlesterimiz joǵary tur. Máselen, Halyqaralyq shaıbaly hokkeı federasııasynyń reıtınginde Qazaqstan 19-oryndy ıelenýde. Polsha bizden úsh, Ýkraına alty saty tómen tur. Al Nıderland 28-oryndy qanaǵat tutýda.
6 aqpanda otandastarymyz Ýkraınamen sheberlik baıqasady. Birinshi dıvızıon komandalary arasyndaǵy álem chempıonatynda biz olardy eki ret jeńgenbiz. О́z tarıhynda ýkraınalyqtar Olımpıadaǵa bir ret qana qatysty. Kelesi kúni Nıderlandpen kezdesemiz. Qyzǵaldaqtar eli ókilderiniń sporttyń bul túrinde jeńispen órilgen baı tarıhy joq. Sondyqtan da bul joly da san soqtyrý aıtarlyqtaı qıyndyq týǵyza qoımas. 9 aqpanda Polshaǵa qarsy oınaımyz. Túrli jarystarda polıaktarmen birneshe márte jolymyz qıysty. Ol básekelerdiń deni qazaqstandyqtardyń paıdasyna sheshildi. Sońǵy ret aıtýly eldiń ókilderin 6:1 esebimen oısyrata uttyq. Onyń ústine, olar Olımpııa oıyndaryna sońǵy ret sonaý 1992 jyly qatysty. Sodan keıin qatarynan jeti ret tórtjyldyqtyń basty básekesinen shet qaldy.
Ýkraına, Nıderland jáne Polshaǵa qaraǵanda Qazaqstannyń jaǵdaıy áldeqaıda jaqsy. 1998 jyly Nagano Olımpıadasynda hokkeıshilerimiz shırek fınalǵa deıin jetse, 2006 jyly Týrınde toǵyzynshy orynǵa taban tiredi. Olarǵa qaraǵanda álem chempıonattaryna da jıi qatysyp júrmiz. Sondaı-aq Azııa oıyndary (4 altyn+2 kúmis) men Dúnıejúzilik Ýnıversıadada (1 altyn+4 kúmis+1 qola) alty retten jeńis tuǵyryna kóterildik.
Eger Nur-Sultandaǵy synaqtan súrinbeı ótsek, irikteý týrnıriniń negizgi bóliginde kúsh synasý qurmetine ıe bolamyz. Bul básekeler Slovakııa, Latvııa jáne Norvegııada ótedi.
