Biraq jol erejesin saqtaýǵa qatysty júrgizgen zertteýler, erlerge qaraǵanda áıelderdiń erejeni jıi buzatynyn anyqtaǵan. Ásirese, qala ishindegi joldarda erejege baǵynbaıtyn boıjetkender kóp kezdesedi eken. Burylýǵa bolmaıtyn tustardy kórineý qıyp ótý, kóliktegi eskertý gabarıtterin iske qospaý, jaryq quraly men eskertý belgilerin ajyratpaý sııaqty júrgizýshiler jibermeýi tıis qatelikterdi aıtpaǵanda, názik jandylardyń kesirinen bolǵan apatty jaǵdaılar kóbeıgen. Bul týraly bizge Taldyqorǵan qalasy polısııa basqarmasynyń aǵa tergeýshisi Dıdar Seıitjan aıtqan edi.
Polısııa derekterin saralap otyryp, kólik aıdaǵan qyz-kelinshekterdiń kesirinen bolǵan jol-kólik oqıǵalaryna qatysty birneshe oqıǵaǵa keziktik. Mysaly, oblys polıseıleri mas kúıinde kólik júrgizgen áıeldi ustapty. Oqıǵa Balqash aýdanynyń ortalyǵy Baqanas aýylynda bolǵan. Patrýl polısııasy kúdik týǵyzǵan «Toıota Karına» kóligin tekserý úshin toqtatqan eken. Qujat tekserý kezinde tizgindegi áıel adamnyń alkogoldi ishimdik ishkeni anyqtaldy. Otyz toǵyz jastaǵy kelinshektiń mas kúıinde kólik rýline otyrǵanyn medısınalyq saraptama da aıqyndaǵan.
Aıtpaqshy, «Toıota Karına» kóliginiń ıesi buǵan deıin de «qyzyp alyp» kólik basqarǵany úshin aıyp tólep, sottyń sheshimimen 3 jylǵa deıin avtokólik quraldaryn basqarý quqynan aıyrylǵan eken. Endi aýyl turǵynyn asa úlken kólemdegi aıyppul men qoǵamdyq jumysqa jegý nemese 5 jylǵa deıingi bas bostandyǵynan aıyrý jazasy kútip tur.
Taǵy bir ókinishti jaǵdaı oblys ortalyǵynda bolǵan. Taldyqorǵan qalasynyń soty jylǵa jýyq ýaqytqa sozylǵan atyshýly iske qatysty sheshim shyǵarypty. Qandy oqıǵa 2019 jyldyń naýryz aıynda bolǵan edi. 64 jastaǵy júrgizýshi áıel Infiniti kóliginiń tizginine ıe bola almaı, avtomashına jol boıyndaǵy avtobýs aıaldamasyna soǵylǵan. Joǵary jyldamdyqpen kelgen kólik aıaldamada turǵan 2 adamdy taptap ótip, 14 jastaǵy qyzdy aýyr jaraqattaǵan. Soqqy saldarynan jas jubaılar oqıǵa ornynda til tartpaı ketken.
Jylǵa jýyq júrgen tergeý kezinde adam ólimine sebepker bolǵan júrgizýshi áıelge qatysty bultartpaý sharasy birneshe ret ózgertilgen. Bul oqıǵadan habardar bolǵan qala turǵyndary narazylyq bildirgen. Sot sheshimi jarııalanǵaly beri de adamdar júrgizýshige kesilgen jazany tym jeńil degen pikirde. Al Taldyqorǵan qalalyq soty kináli áıeldiń jas egdeligin jáne istegen qylmysyn moıyndap, ókinish bildirgenin esepke alyp, 5 jylǵa shartty merzimge bas bostandyǵyn shekteýdi uıǵarypty. Aıtpaqshy, shartty jazalanǵan áıel 7 jylǵa deıin kólik basqarý quqyǵynan da aıyrylypty.
Kólik demekshi, Almaty oblysynda Reseı, Qyrǵyzstan jáne Armenııa eliniń esebinde turatyn kólik sany kóp. О́kinishke qaraı, bul kólik ıeleri de jol erejesin belden basyp, aıyppul tóleýden jaltaryp kelgen eken. Joldaǵy oqıǵalarǵa da sebepshi bolǵandary joq emes. О́tken jyly sheteldik nómirli 37 kólik apatqa ushyrapty. Oblys polıseıleriniń dereginshe, aımaq joldarynda bolǵan osy apattardyń kesirinen 80 jolaýshy jaralanyp, 18 adam qaıtys bolǵan.
Almaty oblysy
