«Búgingi tańda turǵyn úı kezeginde 48 myń adam tur. Memleket basshysynyń tapsyrmasyna sáıkes qoljetimdi turǵyn úı kólemin 3 ese ulǵaıtamyz. Qoljetimdi baspana kezekke sáıkes jáne tek qana zań sheńberinde beriledi. Siz qujattaryńyzben kelgen kezde, biz bazaǵa qarap, barlyǵyn tekseremiz. Eger sizdiń atyńyzda turǵyn úı bolsa, ol aqparatty bazadan kóremiz. Turǵyndar óz jaýapkershiligin túsinip, barlyq qajetti qujattardy retke keltirýi tıis. Sondaı - aq bıyl jastarǵa arnalǵan jalǵa beriletin turǵyn úı baǵdarlamasyn jalǵastyramyz», - dedi qala ákimi Altaı Kólginov.
2019 jyldyń qorytyndysy boıynsha elorda turǵyndaryna qoljetimdi 2,9 myń páter berildi. (1050 páter jastarǵa arnalǵan jalǵa beriletin páterler). Páter alǵandardyń qatarynda halyqtyń áleýmettik álsiz toptary, jetim balalar, tolyq emes otbasylar, erekshe qajettilikteri bar balalardy tárbıelep otyrǵan otbasylar, Uly Otan soǵysy múgedekteri men qatysýshylary, kóp balaly otbasylar bar.
Eske sala keteıik, ótken aptada elorda ákimi «Baıqońyr» aýdany ákiminiń esep berý kezdesýine qatysty. Turǵyndardyń suraqtary jumysqa alyndy.
