Almatyǵa «Qaqpaqshaly jáne qaqpaqshaly emes júrekshe fıbrıllıasııasyn dıagnostıkalaý men emdeýdiń zamanaýı ádisteri» taqyrybyndaǵy sheberlik dárisine qatysý úshin Qazaqstannyń barlyq óńirinen kardıolog dárigerler keldi.
«Qazaqstan men Ortalyq Azııa aýmaǵynda júrekshe fıbrıllıasııasyn krıotehnologııa kómegimen emdeý jáne sol jaq qulaqshasyn torakoskopııalyq klıpteý tuńǵysh ret qoldanylyp otyr. Osy ádispen emdeý naýqastarda kezdesetin kardıogendik ıshemııaly ınsýlttiń jıiligin jáne gemorragııaly asqynýlardy azaıtady. Búgin osynda Qazaqstannyń barlyq óńirinde ıntervensııalyq kardıologter men arıtmologter, kardıohırýrgter qatysyp otyr. Bizdiń ınstıtýtta bul ádis aprobasııadan ótkizilgennen keıin, elimizdiń barlyq óńirlerinde tehnologııalardy taratý arqyly osy ádistiń qoldanylýyna múmkindik beredi», deıdi Jasandy qanaınalym zerthanasy men operasııa bloginiń kardıohırýrgııa bólimshesiniń meńgerýshisi Rústem Tóleýtaev.
Qazaqstanda alǵash ret Germanııanyń Gambýrg qalasynan kelgen jetekshi kardıohırýrg, professor Torsten Hanke krıoblasııa (ekstremaldyq sýyqtyń áserine negizdelgen júrek arıtmııasyn emdeý) jasaı otyryp, mıtraldyq qaqpaqshaǵa hırýrgııalyq túzetý operasııasyn júrgizdi.
Professor Torsten Hankeniń aıtýynsha, júrekshe fıbrıllıasııasyn sátti emdeý pasıentterdiń ómirin jaqsartyp, ǵumyryn uzartyp, ınsýlt qaýpin azaıtýǵa múmkindik beredi. Sonymen qatar doktor Torsten Hanke mamandardy oqytýda hırýrgtiń alǵashqy bes operasııasy mindetti túrde tájirıbeli mamannyń jetekshiligimen jasalýy keregin atap ótti.
Instıtýttyń kardıologııa kafedrasynyń professory Kúlzıda Qoshymbaeva júrekshe fıbrıllıasııasyna ablıasııa jasalǵannan keıin pasıentterdi otaǵa deıin jáne otadan keıin emdep-qaraý týraly, al júrek yrǵaǵynyń jáne ótkizgishtiginiń buzylýy bólimshesiniń meńgerýshisi Roın Rekvava – júrekshe fıbrıllıasııasyn kateter arqyly emdeýdiń ádisterin atady.
Sheberlik dárisinde derti naqtylanǵan naýqastarǵa ota jasalyp, qatysýshylar Kardıologııa jáne ishki aýrýlar ǴZI bólimshe meńgerýshileri Rústem Tóleýtaev pen Roın Rekvavanyń professor Torsten Hankemen birlesip jasaǵan operasııalaryn kórip otyrdy. Kelesi kúni Rústem Tóleýtaev elimizdiń barlyq óńirinen kelgen dárigerlerdi júrekshe fıbrıllıasııasyn torakoskopııalyq emdeýdiń tásilderimen tanystyrdy. Mundaı sheberlik dárisin ótkizý kardıohırýrgııadaǵy operatıvtik aralasýlar tehnıkasyn meńgerýge, mamandardyń kásibı daǵdysyn jańa deńgeıge kóterýge múmkindik beredi.
Aıta ketelik, professor Tosten Hanke (Thorsten Hanke) álemdik tájirıbede belgili kardıohırýrg, Torakaldy jáne júrek-tamyr hırýrgııasy jónindegi nemis qoǵamynyń, Eýropalyq kardıotorakaldy hırýrgııa qaýymdastyǵynyń, Nemis kardıologııa qoǵamy Arıtmııa jumys tobynyń, sondaı-aq Nemis kardıologter qoǵamynyń múshesi. Ol medısına salasynda jasaǵan eńbegi men ǵylymı jańalyqtary úshin kóptegen salalyq syılyq pen grantqa ıe bolǵan.
ALMATY
