MÚDDELER ÚDESINEN ShYǴÝ JOLYNDA

Keshe Syrtqy ister mınıstrliginde atalǵan vedomstvonyń baspasóz hatshysy Ilııas Omarovtyń qatysýymen jýrnalıs­ter­ge arnalǵan baspasóz máslıhaty bolyp ótti. I.Omarovtyń sózine qaraǵanda, Qazaqstan Prezıdenti Nursultan Nazarbaevtyń arnaıy shaqyrýymen 29-31 naýryz aralyǵynda Slovakııa Respýblıkasynyń prezıdenti Ivan Gashparovıch elimizde memlekettik saparmen bolmaq. Bul memlekettik sapar kezinde qos tarap halyqaralyq Uıym sheńberindegi ózara ekijaqty yntymaqtastyq máselelerin talqylaıtyn bolady. “Bul sapar barysynda, sondaı-aq, eki eldiń iskerlik top ókilderiniń qatysýymen bıznes-forým uıymdastyrylyp, birqatar mańyzdy qujattarǵa  qol qoıylmaq”, dedi I. Omarov. Qazaqstan men Slovakııa arasyndaǵy dıplomatııalyq baılanys jolǵa qoıyl­ǵannan keıin eki eldiń joǵary deńgeıde saıası únqatysýyna da meılinshe jol ashylǵan. Máselen, Memleket basshysy N. Nazarbaevtyń 2007 jyldyń qarasha aıynda Slovakııaǵa jasaǵan memlekettik sapary osynyń aıǵaǵy der edik. Bul sapar qos memlekettiń saıası yntymaqtastyq tetikteriniń nyǵaıýyna sep bolǵan edi. Qazirgi tańda Qazaqstan men Slovakııanyń úkimetaralyq jáne vedomstvoara­lyq baılanystary jandanyp keledi. Eki eldiń parlamentinde áriptestik úderisterin nyǵaıtatyn parlamentaralyq toptyń jumysy jolǵa qoıylǵan. Baspasóz máslıhaty barysynda Memlekettik hatshy – Syrtqy ister mınıstri Qanat Saýdabaevtyń Shyǵys Eýropanyń birqatar elderine jasaıtyn resmı sapary da atap ótildi. “30 naýryz ben 1 sáýir aralyǵynda EQYU-nyń Is basyndaǵy tóraǵasy, Memlekettik hatshy – Syrtqy ister mınıstri Qanat Saýdabaev Mınsk, Kıev jáne Kıshınev qalalarynda bolyp, kezdesýler ótkizedi. Bul sapar barysynda Qanat Saýdabaev Belarýs, Ýkraına jáne Moldova elderiniń parlament jáne syrtqy saıasat vedomstvolary basshylarymen, sondaı-aq, saıası partııalar jetekshilerimen bedeldi Uıym tóńiregindegi mańyzdy máselelerdi keńinen talqylaıtyn bolady”, dedi baspasóz hatshysy.