Kókeıtesti máselesin oblys ákiminiń aldynda aqtarǵan turǵyndardyń biri - tólebılik Urzııa Sergebaeva baspana taýqymetin tartyp keledi eken. Jaldamaly páterdi panalap júrgen bes balanyń anasy turaqty baspanaǵa muqtaj. 1,5 mln teńge kóleminde ataýly áleýmettik kómek alǵan ana, aǵylshyn jáne arab tilderinen aqyly sabaq berýmen aınalysady eken. Kópbalaly ananyń ótinishin tyńdaǵan oblys basshysy aýdan ákimdigine tıisti tapsyrma berdi. Baspana taýqymetin tartqan taǵy bir kópbalaly ana – Jazıra Turǵynova. Jeti balanyń anasyna ákimdik demeýshilerdiń kómegimen Lengir qalasynan 8,5 mln teńgege 5 bólmeli, tolyq jıǵaz-jabdyqtarmen qamtylǵan jeke úı satyp alyp bergen. Otaǵasyna birneshe jerden jumys ta usynylypty. Degenmen kópbalaly ana úıiniń qazir apatty jaǵdaıda ekenin aıtyp shaǵymdandy. О́mirzaq Estaıuly otbasynyń turmysyn arnaıy komıssııa tekserip, qajet bolsa demeýshiler esebinen «Qamqorlyq» jobasy aıasynda kómek kórsetiletinin aıtty. Al Maqtaaral aýdany, Myrzatóbe eldi mekeninen kelgen Ońlasyn Nazarov balabaqsha ashyp, sport keshenin salýdy jáne eldi mekendi tabıǵı gazben qamtý ótinishin jetkizdi. Bul oraıda oblys ákimi aýdan ákimdigine aýyldaǵy «Mahambet О́temisuly» atyndaǵy №28 jalpy orta mektebiniń eski ǵımaratyn kúrdeli jóndeýden ótkizip, balabaqsha ashýdy, jergilikti bıýdjet esebinen sporttyq alańsha salýdy jáne aýyldy kógildir otynmen qamtýdy qolǵa alýdy tapsyrdy.
Qabyldaýǵa kelgender arasynda belgili bir máselege baılanysty usynys-jobalaryn jetkizgender de boldy. Mysaly, Ermahan Kýskeev Iаsaýı men Arystan bab keseneleri aralyǵyndaǵy atyrapqa túrki elderindegi eń ozyq mádenı muralardyń jıyntyǵyn jasaqtaý josparymen tanystyrdy. Jalpy oblys ákiminiń jeke qabyldaýyna kelgen turǵyndar kótergen máseleler baqylaýǵa alynyp, olardy sheshý aýdan ákimderi men tıisti basqarma basshylaryna júkteldi.
