Nur-Sultan qalasynyń emhanalarynda densaýlyqty qalpyna keltirý jáne ońaltý qyzmeti buryn da bolǵanymen, bárine birdeı qol jetimdi emes edi.
Qazirgi ýaqytta MÁMS arqasynda bul qyzmettiń túri kóbeıtilgen. №2 qalalyq emhananyń dırektory Lázzat Ryspekova MÁMS aıasynda ótken jyly balalardy ońaltýǵa 28 tegin joldama berilse, 2020 jyldyń qańtar aıynda 34 bala ońaltý qyzmetine júgingendigin aıtty.
«Fızıoterapevtik qyzmet pen massaj jasaý buryn aqyly edi. Al, qazir bul qyzmetter halyqtyń bárine tegin kórsetiledi. Bizge 74 mln teńgege jýyq qarajat bólinip, jarty jyldaı osyǵan daıyndaldyq. Ońaltýshy, nevropatolog, logoped jáne basqa da dárigerler bilimin shetelden jetildirip keldi. Dárigerler Daýn aýrýy, epılepsııa, aýtızm tárizdi aýrýlardy anyqtap, qajetti emdeý kýrsy men ońaltý sharalaryna joldama beredi», dedi emhana dırektory.
Erekshe qajettikteri bar balalarǵa MÁMS júıesiniń balalarǵa kórsetetin qyzmetteriniń barlyǵy tegin. Sondaı-aq MÁMS sheńberinde dári-dármekpen qamtamasyz etý qaıta qarastyrylyp, sozylmaly aýrýlarmen aýyratyn tulǵalar men balalarǵa da tegin dári-dármek alý múmkindigi júzege asyrylady.
Sonymen qatar osy ýaqytqa deıin qymbat turatyn tekserý qyzmetteri (Gepatıt V jáne S, PSR, garmondarǵa qan taldaýlary, KT, MRT apparattary) aqyly nemese «D» esepte turǵan tulǵalarǵa ǵana tegin boldy. Qazirgi kezde bul qyzmetter saqtandyrylǵan halyqtyń barlyǵyna tegin kórsetiledi.
Máselen, №6 qalalyq emhanada MRT qyzmetine byltyr bir jylǵa 10 kvota bólinse, bıyl tek qańtar aıynda 18 adamǵa joldama berilgen. Aqyly bolyp kelgen qan taldaýlary da tegin jasalady. MÁMS aıasynda stasıonarlyq kómekti uıymdastyrý da júzege asyrylady. Turǵyndar ózderi tirkelgen emhanada barlyq qan taldaýlary men ÝDZ, basqa da zertteýlerden ótip, qortyndysy boıynsha joldama arqyly aýrýhanaǵa jatqyzylady. Jedel pasıentterge TMKKK boıynsha, al josparly pasıentterge MÁMS boıynsha qyzmet kórsetiledi. MÁMS-tiń aıasynda turǵyndardyń jeke medısınalyq emhanalarǵa qaralý múmkindigi bar. Elordada atalmysh paket aıasynda pasıentterge medısınalyq qyzmet kórsetetin 15 jeke klınıka esepteledi. Solardyń biri – «Medıker» medısınalyq ortalyǵy. MÁMS qorymen kelisim shart negizinde ortalyqta qańtar aıynda kompıýterlik tomografııaǵa 6 adam, MRT-ǵa 4 adam joldama alǵan. ÝZD, EKG sııaqty qyzmetterden bólek pedıatr, gınekolog, mammolog, hırýrg, ýrolog jáne stomatolog dárigerlerdiń kabınetteri jumys istep tur. Buryn bul ortalyqta aqyly qyzmet alyp júrgen turǵyndar endigi kezekte MÁMS júıesi arqyly emhana kómegin tegin alyp jatyr.
Aıta keteıik, MÁMS júıesinde tirkelmegen turǵyndar 1 sáýirge deıin ózin saqtandyrýy tıis. Turǵyndar yńǵaıy úshin medısınalyq uıymdarda tólem termınaldary ornalastyryldy.
