Sýret: ult.kz
«Munaı jáne munaı ónimderiniń zańsyz aınalymy da qylmystyq toptardyń baıý kózderiniń biri bolyp otyr. Ońtústik Qazaqstan oblysynda munaıdy qubyr arqyly urlaýmen aınalysqan uıymdasqan qylmystyq toptyń 10 múshesi qazir qamaýda sot úkimin kútip otyr. Olardyń ishinde qubyrlardy kúzetýge mindetti «SEMSER Securiti» kúzet agenttigi» JShS dırektory N.Moltaev ta bar», – dedi resmı ókil.
Qylmystyq is materıaldary boıynsha atalmysh top músheleri 2012 jyldyń shilde-jeltoqsan aılary aralyǵynda 17 mln. teńgeden astam somaǵa 4000 tonna kóleminde shıki munaıdy urlaýdy júzege asyrǵan. Olar munaıdy «Qumkól-Pavlodar-Shymkent» qubyrynan alyp, tasymaldap áketip otyrǵan. Álbette, top músheleri «qara altyndy» odan ary satý maqsatynda urlaǵan. Jáne sol josparlaryn udaıy oryndap otyrǵan.
Qarjy polısııasy agenttigi men Atyraý, Aqtóbe jáne Batys Qazaqstan oblystary departamentteriniń qyzmetkerleri osy kúnderi júrgizilgen keń aýqymdy operasııa nátıjesinde 2012-2013 jyldary munaıdyń zańsyz aınalymy salasynda qyzmet etken basqa da qylmystyq topty áshkerelegen.
«Qazaqstannyń 6 jáne Moldovanyń 2 azamatynan turatyn top Aqtóbe oblysyndaǵy ken oryndarynan jalpy kólemi 739 tonna munaı urlaǵan», – dep atap ótti osy oraıda M.Jumanbaev. Onyń aıtýynsha, urlanǵan munaıdyń 365 tonnasy peshtiń janar-jaǵarmaıy túrinde alys shetelderge eksportqa shyǵarylǵan. Qalǵan bóligi, ıaǵnı 373 tonnasy jóneltilý kezinde toqtatyldy. Osymen birge, operasııa barysynda qylmystyq toptyń barlyq músheleri qolǵa tústi. Olar sot sanksııasymen túgeldeı qamaýǵa alyndy.
«Qylmystyq toptyń basshysy Kamalýtdınov jáne onyń sybaılasy «Bimol Oil» JShS dırektory Izımov qamaýǵa deıin qarjy polısııasy qyzmetkerlerine para berý arqyly osy qylmystyq toptyń qyzmetin tekserýdi toqtatýǵa áreket jasaǵan. Bul faktiler bekitilip, olar boıynsha qylmystyq ister qozǵaldy. Tekseristi toqtatý jáne osy topqa ári qaraı qamqorlyq jasaý úshin 755 myń teńge somasynda Atyraý oblysynyń qarjy polısııasy qyzmetkerlerine, oǵan qosa 630 myń teńge somasynda Aqtóbe oblysynyń qarjy polısııasy qyzmetkerlerine para berý faktileri boıynsha qylmystyq ister qozǵaldy», – dep baıandap ótti resmı ókil.
Qurysh NURYMBET.
