Soltústik Qazaqstan oblysy IID Ákimshilik polısııa basqarmasynda “Qarý” atty oblystyq jedel-profılaktıkalyq is-sharasynyń qorytyndysy shyǵaryldy. Bes kún ishinde ákimshilik polısııa men jergilikti polısııa qyzmetkerleri qarý ıelerin tekserip, basty nazarda – qarýdy saqtaý, alyp júrý jáne ýaqytyly qaıta tirkeý erejelerin saqtaý sııaqty qaǵıdalar tekserildi.
Ákimshilik polısııa basqarmasynyń bastyǵy, polısııa podpolkovnıgi Jasulan Omarovtyń málimeti boıynsha, jedel-profılaktıkalyq is-sharaǵa 500 astam qyzmetker jumyldyryldy. Onymen qosa 83 reıdtik toptar jumys atqardy. Reıdtiń maqsaty – tirkelgen qarýdy urlaýdyń aldyn alý, qarýdy qoldaný arqyly qylmystar men quqyq buzýshylyqtardyń jasalýynyń aldyn alý, sondaı-aq qarýdy saqtaý, alyp júrý, tasymaldaý jáne paıdalaný erejelerin saqtaý bolyp tabylady.
Nátıjesinde 5 kúnde 2730 qarý ıeleri tekserilip, 136 adam ákimshilik jaýapkershilikke tartyldy. Onyń ishinde 109 – qarýdy saqtaý erejelerin buzǵany úshin, 27 – qarýdy qaıta tirkeý merzimderin buzǵany anyqtaldy. Quqyq buzýshylardyń árqaısysynan qarý ýaqytsha tárkilendi. Olar tek aıyppul tóleý ǵana emes, sonymen qatar qaıta oqytýdan ótip, qarýdy odan ári paıdalaný úshin synaq tapsyratyn bolady.
Ákimshilik polısııa basqarmasynda qarý kez-kelgen ýaqytta joǵary qaýip kózi bolyp tabylatyndyǵyn atap ótti. Bul saladaǵy qylmystar men quqyq buzýshylyqtardyń aldyn alý, qarý aınalymy máseleleri oblystyq polısııa basshylyǵy men ýchaskelik polısııa ınspektorlarynyń turaqty baqylaýynda.
