Tedros Adhan Gebreıesýspen áńgimelesý barysynda Qazaqstan men Dúnıejúzilik densaýlyq saqtaý uıymy arasyndaǵy yqpaldastyqtyń, sonyń ishinde koronavırýstyń taralýyna qarsy is-sharalardyń ózekti máseleleri talqylandy.
Qasym-Jomart Toqaev koronavırýstyń taralýynyń aldyn alý jáne oǵan jol bermeý úshin Qazaqstanda qabyldanǵan sharalar týraly aıtty.
Dúnıejúzilik densaýlyq saqtaý uıymynyń basshysy Qazaqstan Prezıdentine koronavırýstyń taralýyna baılanysty álemdegi ahýal jaıynda málimet berdi.
Peter Maýrermen kezdesýde Qazaqstan men Halyqaralyq Qyzyl Krest komıteti arasyndaǵy baılanystardy odan ári nyǵaıtý máseleleri qarastyryldy. Taraptar halyqaralyq kún tártibindegi ortaq máseleler týraly pikir almasty.
Qasym-Jomart Toqaev Qazaqstan tarapynan júrgizilgen «Jýsan» jáne «Rýsafa» gýmanıtarlyq operasııalardyń barysynda HQKK-niń kórsetken qoldaýyna joǵary baǵa berdi.
Peter Maýrer Prezıdentke Qazaqstanda Halyqaralyq Qyzyl Krest komıtetiniń ókildigin ashýǵa múmkindik bergeni úshin rızashylyq bildirdi.
Kezdesý sońynda Memleket basshysy Qasym-Jomart Toqaev Qazaqstan men Halyqaralyq Qyzyl Krest komıtetiniń arasyndaǵy yntymaqtastyqty damytýǵa qosqan úlesi úshin Peter Maýrerge II dárejeli «Dostyq» ordenin tapsyrdy.
