1958-64 jyldary «Mádenıet jáne turmys» jýrnalynda aldymen redaktordyń orynbasary, keıin bas redaktory bolyp jumys istedi.
1965-73 jyldary Qazaqstan Kompartııasy Ortalyq Komıtetiniń nasıhat jáne úgit bóliminiń nusqaýshysy, baspasóz sektorynyń meńgerýshisi, bólim meńgerýshisiniń orynbasary qyzmetterin atqardy.
1973 jyly «Sosıalıstik Qazaqstan» gazetiniń bas redaktorlyǵyna taǵaıyndaldy. Bul qyzmette 11 jyl jumys istedi. Osy jyldary ol Qazaqstan Kompartııasy Ortalyq Komıtetiniń múshesi, Qazaq QSR Joǵarǵy Keńesiniń depýtaty, Qazaqstan Jýrnalıster odaǵy basqarmasynyń tóraǵasy, KSRO Jýrnalıster odaǵy basqarmasy tóraǵasynyń orynbasary bolyp saılandy.
1984 jyldan 1994 jylǵy zeınet demalysyna shyqqanǵa deıin respýblıka Bas arhıv basqarmasynyń bastyǵy bolyp istedi.
S.Baıjanovtyń sińirgen eńbegi Halyqtar dostyǵy, Qurmet Belgisi ordenderimen, medaldarmen, respýblıka Joǵarǵy Keńesiniń Qurmet gramotalarymen atap ótildi. Oǵan «Qazaqstannyń eńbek sińirgen qyzmetkeri» ataǵy berilgen. Ol – Qazaqstan Respýblıkasy Gýmanıtarlyq ǵylymdar akademııasynyń tolyq múshesi.
S.Baıjanovtyń shyǵarmashylyq murasy romandardan, pesalardan, sondaı-aq, aýdarmalardan turatyn jıyrmadan astam kórkem shyǵarmany quraıdy. 1974 jyly onyń «Úsh qııan – úsh dańǵyl» ocherkter kitaby KSRO Jýrnalıster odaǵynyń syılyǵyna ıe boldy. Sońǵy jyldary kóbine arhıvtik zertteýlermen aınalysyp, kóptegen tarıhı málimet pen qujattardy ǵylymı aınalymǵa endirdi. Onyń «Arhıv – aıǵaq» kitaby Ahmet Baıtursynov atyndaǵy syılyqty alsa, «Abaı jáne arhıv» týyndysy Álıhan Bókeıhanov atyndaǵy syılyqpen atap ótilgen.
S.Baıjanov jan-jaqty bilgir adam, eńbekqor da adal basshy, adamdarǵa yqylasshyl da sezimtal.
