Sodan 37 jyl boıy osy redaksııada úzdiksiz qyzmet etti. Bul jyldary ol qatardaǵy ádebı qyzmetkerden bastap redaksııanyń bólim meńgerýshisi, redaktordyń orynbasary, birinshi orynbasary, al 1983-1987 jyldary osy gazettiń bas redaktory bolyp istedi. Bilikti basshy, bilgir uıymdastyrýshy retinde basylym bedeliniń artýyna laıyqty úles qosty.
B. Qydyrbekuly respýblıkanyń qoǵamdyq ómirine belsene aralasty. Ol kezinde Qazaqstan Kompartııasy Ortalyq Komıtetiniń múshesi, respýblıka Joǵarǵy Keńesiniń birneshe dúrkin depýtaty bolyp saılandy, Qazaqstan Jýrnalıster odaǵyna basshylyq etti.
Baspasózde tynymsyz eńbek ete júrip, jazýshylyqpen de aınalysa bildi. Onyń birneshe kitaby jaryq kórdi. Ásirese, jazýshynyń epopeıalyq deńgeıge jetkizýdi kózdep, keń qulashpen, shalqar shabytpen jazylǵan «Alataý» romanynyń alǵashqy eki kitaby oqyrman qaýymnyń aıryqsha yqylasyna bólendi.
B. Qydyrbekuly elimizge sińirgen eńbegi úshin Eńbek Qyzyl Tý, Halyqtar dostyǵy ordenderimen, birneshe medalmen nagradtalǵan. Oǵan «Qazaqstan Respýblıkasynyń eńbek sińirgen mádenıet qyzmetkeri» degen qurmetti ataq berilgen.
Qazir jazýshy-jýrnalıstiń týǵan aýyly Taran – Balǵabek Qydyrbekulynyń atynda. Ondaǵy mektepke de qalamgerdiń aty berilgen.
