Burynǵydan uǵynyqty jazylǵan

Bul otyrysta sóz tizginin qo­ǵam qaı­ratkeri, Ulttyq qoǵamdyq senim keńesiniń múshesi Murat Ábe­nov ustady. Ol sóz basynda zań jobasy qoldanystaǵy zań­ǵa túzetý engizýdi ǵana kózdemeı, beıbit jınalystardyń barlyq túrin uıym­das­tyrýdy retteıtin jańa normatıvtik quqyq­tyq akt ekenin atap ótti. Sondaı-aq mo­derator mıtıng ótkizýdiń baǵyt-baǵdary bolatyn jańa zań­nyń tujyrymdamasyna qatys­ty árbir azamat oı-pikirin, usynys­taryn 21 aqpanǵa deıin Ashyq úkimet saıty arqyly bildire alatynyn jetkizdi.

Búginde elimizde «Qazaqstan Res­pýblıkasyndaǵy beıbit kezde­sýlerdi uıymdastyrý jáne ótkizý tártibi týraly» zań jobasy qyzý talqylanyp jatyr. Bul taqyryp biraz qoǵam belsendisiniń basyn qosqan jıynǵa da arqaý boldy. Ári atalǵan pikirtalas alańy #TaldaKZ Onlaın sarapshylar platformasy arqyly tikeleı efırde ótti. Bul talqylaýǵa áleýmettik jelilerdiń kómegimen kópshilik te aralasyp, suraqtaryn qoıdy, pikirlerin bildirdi.

Jıynǵa Aqparat jáne qoǵam­dyq damý mınıstrligi Azamattyń qoǵam isteri komı­tetiniń tóraǵasy Álııa Ǵalymova qatysyp, zań jobasy jóninde óz oıyn ortaǵa saldy.

– Bul – túbegeıli jańa zań jobasy. 1995 jylǵy zańǵa qara­ǵanda, túsinikti qujat bolady dep oılaımyn. Beıbit jınalystardyń barlyq túri, sonyń ishinde mıtıngiler, sherýler, demonstrasııalar, pıketter ótkizý týraly osy zań jobasynda anyq jáne uǵynyqty jazyl­ǵan. Ekinshiden, beıbit jına­lystar ótkizý ótinimderiniń regla­mentteý jáne habarlandyrý tártibi engiziledi. Eger qan­daı da bir uıymdy nemese qoǵam­dy tolǵandyratyn másele boıyn­sha beıbit jınalysty uıym­dastyrýshy jergilikti atqarýshy organǵa ótinim bergen jaǵdaıda, onda ótkizý ornyn, maqsatyn jáne kúnin aıqyndaıdy, qaty­sý­shylardyń sanyn naqty belgi­leıdi. Sondaı-aq ol jınalys ótkizý úshin qajetti sharttardy anyqtaıdy, – dedi Álııa Ǵaly­mova.

Al qoǵam qaıratkeri, Ulttyq qoǵamdyq senim keńesiniń múshesi Erlan Saırov azamattardyń jańa zań jónindegi barlyq talap-tilegi eskeriletinine senim artty.

– Bul zań qazaqstandyqtardy beıjaı qaldyryp otyrǵan joq. Adamdar osyǵan qatysty túrli pikirlerdiń aıasynda toptasyp jatyr. Biraq olardyń arasynda antagonızm paıda bolmaýy kerek. Búkil prosestiń beıbit túrde kelisimmen júrgizilýi mańyz­dy. Ulttyq keńestiń músheleri retinde óz pozısııa­larymyzdy jaqyndastyrýymyz kerek. Me­nińshe, osy zańnyń árbir babyn talqylaǵannan góri, zańǵa qatysty oı-pikirleri bar azamat­tardyń basyn qosyp, birlesken komıssııa otyrysyn ótkizý kerek sııaqty, – dedi Erlan Saırov.

Sonymen qatar Eýrazııalyq ıntegrasııa ınstıtýtynyń sarapshysy Samat Nurtaza mıtıngige qatysýshylardyń sanyn belgileýge qatysty óz oıymen bólisti. Ol beıbit jıyndarǵa qaty­sa­tyndar 250 adamnan as­paý kerek degen oıdy qupta­dy. Iаǵnı, mıtıng ótkizý máde­nıeti qalyptasqan sa­ıyn birtin­dep qatysýshylardyń sanyn kó­beıtýge bolady. Buǵan qosa qoǵam belsendisi syrtqy kúshterdiń qurbany bolyp ketpeýi úshin kish­kentaı balalardy mıtıngige alyp kelýge qarsy ekenin jetkizdi.