Sodan shákirtteriniń sanynyń kóptigin emes, sapasyn, solardyń jetistigin maqtan tutýdy maqsat etken Roman Alaýuly oqýshylarǵa sabaqtan tys ýaqytta «Jas programmalaýshylar» úıirmesin ashyp, oqýshylardy qyzyqtyryp, pándik olımpıadalarǵa daıyndaýǵa kirisip ketipti.
Sóıtip búginge deıin sol maqsatynan aınymaı kele jatqan Roman 22 jyl ishinde ınformatıka páninen 22 shákirt qana emes, fızıka páni boıynsha da 32 shákirt tárbıelep úlgerdi. Dáris bergen shákirtteriniń árbiri mektep qabyrǵasynda júrgende ınformatıka jáne fızıka pánderi boıynsha olımpıada, bilim báıgelerinde mektep, aýdan, oblys jáne respýblıka kóleminde bilim deńgeıleriniń joǵary ekendigin dáleldedi. «Osyndaı bilim jarystary arqyly shákirtterimdi ómirge beıimdep, bilimin ushtaýyna, bolashaq mamandyq tańdaýǵa kómektesý arqyly ózim de kásibı deńgeıde óse otyryp, pedagogıkalyq eńbektiń shyńyna órmeledim», deıdi ol.
Sońǵy 22 jyl kóleminde Roman Alaýulynyń shákirtteri aýdandyq pándik olımpıadalarda ınformatıka jáne fızıka pánderinen 9-11 synyptar arasynda birinshi oryndy bergen emes. Daıyndaǵan shákirtteri 2000 jyldan bastap ınformatıka páni boıynsha barlyq oblystyq pándik olımpıadalarǵa úzdiksiz qatysyp, eleýli jetistikterge qol jetkizip keledi.
«Bizdiń mektep oqýshylarynyń deńgeıi qala deńgeıinen kem emes. Osy gımnazııanyń oqýshylary tek aýdan, oblys emes, respýblıkalyq olımpıadalar men baıqaýlarda da top jaryp júr. Búgingi sıfrly tehnologııa men ınternettiń damýy aýyl men qala balasynyń bilimin bir-birine teńestiredi desek bolady», deıdi Roman Alaýuly aǵynan jarylyp.
Roman Qadyrqulovtyń ózi «7-synyp. Informatıka» oqýlyǵy men ádistemelik jınaǵynyń avtory. Bul – Qazaqstanda tuńǵysh ret qazaq tilinde jazylyp, orys tiline aýdarylǵan oqýlyq. Sondaı-aq qazaq, ózbek jáne orys tilderindegi «8-synyp. Informatıka, «3-klass. IKT», 9-synyp jáne 10-synyp jaratylystaný-matematıka baǵytyndaǵy ınformatıka oqýlyqtarynyń, ádistemelik jınaqtarynyń avtory. Ustaz 2005 jyly oblystyq «Altyn dısk» baıqaýynda birinshi oryn alsa, osy jyly oblystyq «Altyn qor» baıqaýynda bas júldeni ıelendi. «Informatıkadan olımpıadaǵa daıyndaý – oqýshynyń logıkalyq oılaý qabiletin damytý jáne dúnıetanymyn keńeıtý kepili» taqyrybynda jasaǵan baıandamasy «Altyn qor» jınaǵyna engen. 2018 jyly Matematıka, fızıka jáne ınformatıka pánderi muǵalimderiniń Respýblıkalyq olımpıadasynda júldeli II oryn ıelendi.
Ol muǵalimdik jumysyn mektep dırektorynyń ǵylymı-ádistemelik jumystar jónindegi orynbasary qyzmetimen ushtastyryp otyrdy. Sondaı-aq mektep-gımnazııanyń ınnovasııalyq jáne eksperımentaldyq alańynda 11 gımnazııa jáne 12 jyldyq 4 eksperıment synybyn 15 jyl boıy basqardy. Osy kezeńde mekteptegi oqý prosesin uıymdastyrý men muǵalimderdiń shyǵarmashylyǵyna, ınnovasııalyq prosesterge, oqýshylardyń pándik olımpıadasy, ǵylymı shyǵarmashylyq jumystar sııaqty mekteptegi shyǵarmashylyq izdenistiń shákili bolǵan baǵyttarǵa tikeleı jaýap berdi. Sonyń nátıjesi bolý kerek, atalǵan bilim oshaǵy sońǵy alty jyldan beri aýdannyń eń úzdik mektebi atanyp júr. Jyl saıyn bul mektepten 8-10 oqýshy oblystyq pándik olımpıadalarǵa qatysyp otyrady. 2016 jyly oblystyq pándik olımpıadaǵa qatysqan 8 oqýshynyń úsheýi I oryn ıelendi.
Azamat OSPANOV,
Túrkistan oblystyq Adamı áleýetti damytý basqarmasynyń baspasóz hatshysy
