Almaty ákimi qurylysshylarmen kezdesti

Aımaqtar • 26 Aqpan, 2020

Almaty ákimi qurylysshylarmen kezdesti

25 ret kórsetildi

Almaty qalasynyń ákimi Baqytjan Saǵyntaev qalany damytýǵa qatysty problemalyq máselelerdi talqylaý úshin qurylys kompanııalarynyń basshylarymen kezdesti.

Arman OKTIаBR

Megapolıste turǵyn úı qurylysynyń qarqyny joǵary. Eger ótken jyly 2,1 mln sharshy metrge jýyq úı paıdalanýǵa berilse, bıylǵy jyly shamamen 2,2 mln sharshy metr turǵyn úı nemese 19,5 myń páter salý josparlanǵan. Onyń ishinde, 1553 myń sharshy metr kommersııalyq qurylys nemese 16029 páter, 593 myń sharshy metr jeke turǵyn úı nemese 2374 turǵyn úı. Memlekettik bıýdjet esebinen 64,5 myń sharshy metr turǵyn úı nemese 1130 páter salý josparlanýda.

Qala ákimi atap ótkendeı, salynǵan árbir jańa úı ómir súrýdi qamtamasyz etý júıesine júkteme túsiredi. Mysaly, tek Naýryzbaı aýdanynyń ózinde ǵana shamamen 500 myń sharshy metr turǵyn úı paıdalanýǵa berildi. Osyǵan oraı, qalanyń jol-kólik ınfraqurylymynyń júktemesi artýda. Sondyqtan ákimniń aıtýynsha, Abaı dańǵylyn úńgileý jumystarynyń qarqynyn tómendetpeý mańyzdy.

Aıta keterligi, ekonom-synypty úılerge ınjenerlik kommýnıkasııalardy júrgizgen kezde páterlerdiń qoljetimdiligine mán beriletin bolady.

Asa mańyzdy máseleniń biri - qalalyqtar sanynyń artýyna oraı áleýmettik nysandarǵa túsetin júktemeniń ulǵaıýy. Qurylys kompanııalarynyń basshylary bul problemany birge sheshýge daıyn ekendikterin bildirdi. Keshendi qurylys barysynda mektepterge, bala baqshalarǵa, emhanalarǵa túsetin júktemeni aldyn ala boljap, áleýmettik nysandardy salýdyń tetikteri anyqtalatyn bolady.

Bos alańdardyń tapshylyǵynan qurylys naryǵyna qatysýshylarmen birge «Eski úı» baǵdarlamasynyń mańyzy artady. Búgingi kúni qalada 1440 úı osy sanatqa jatady.

Salynatyn ár sharshy metrdiń qoljetimdiligi úshin qurylysty júrgizýshiler otandyq óndirýshilerden qurylys jáne árleý materıaldaryn satyp alý kólemin ulǵaıtýǵa daıyn ekendikterin málimdedi. Munda áńgime sanfaıans, kafel, kabel, santehnıka jáne basqa ónimder týraly bolýda. Basty shart – sapanyń halyqaralyq standarttaryna saı bolý. Sondyqtan qala ákimi B. Saǵyntaevtyń tapsyrmasy boıynsha Almatynyń Indýstrıaldy aımaǵyndaǵy «Qarapaıym zattar ekonomıkasy» baǵdarlamasy aıasyndaǵy jobalardy júzege asyrý jónindegi jumystar jandandyrylady.

Kezdesý barysynda qurylysty salýshylarǵa ákimdiktiń qalanyń tarıhı ortalyǵynda jáne aýlalarda ornalasqan ýchaskelerde úı salýǵa tyıym salatyn pozısııasynyń esh ózgermeıtini taǵy bir ret eskertildi.

«Qala ósýde, sondyqtan qurylys megapolıstiń jetekshi draıveri bolyp qala beredi. Munda barlyq taraptardyń – ákimdiktiń, qurylysshylardyń jáne turǵyndardyń múddelerin saqtaý mańyzdy. Buǵan ashyq dıalog arqyly qoljetkizýge bolady. Ony turaqty júrgizetin bolamyz»,- dep atap ótti kezdesýdi qorytyndylaǵan B. Saǵyntaev.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz