Umyt qalǵandar kimnen qorqady?

Tanym • 27 Aqpan, 2020

Umyt qalǵandar kimnen qorqady?

432 ret kórsetildi

Jańa jyldan bastap muǵalimderdiń jalaqysy 30 paıyzǵa ósti. Mádenıet pen sport salasyndaǵy bıýdjettik mekeme qyzmetkerleri de bul jaqsylyqtan shet qalǵan joq. Osy salanyń aımaqtardaǵy qyzmetkerleriniń jalaqysy 35 paıyzǵa, al respýblıkalyq deńgeıdegi mekemelerdiń jalaqysy 50 paıyzǵa deıin kóterildi. Árıne, bilim men mádenıettiń mereıi ústem bolyp, osy salanyń otymen kirip, kúlimen shyǵyp júrgen jandardyń rızyq-nesibesi artqany barshany qýantqany anyq.

Oralhan DÁÝIT

Degenmen de osy tusta bir mamandyq ıeleri umyt qaldy. Ol – mektep kitaphanashylary. Olardyń jumys isteıtin jeri – mektep, ıaǵnı, bilim berý salasynyń qyzmetkeri sanalady, al mamandyǵy jaǵynan mádenıet salasyna jaqyndaý. Biraq mektep kitaphanashylarynyń jalaqysy ózgerissiz qaldy. Sóıtip aılyqtary ósip, aqpan aıynan bastap eki sala jumysshylarynyń daýystary jarqyn-jarqyn shyǵyp jatqanda mektep kitaphanashylary eki jaqtyń da jaqsylyǵynan qur qalyp, kimge shaǵynaryn bilmeı, ańqaıyp qalǵan jaılary bar. Shynynda ne isteý kerek? Jalaqysy ósken jandarmen bir salada, bir mekemede qyzmet etip júrse de barlyǵyna jasalǵan sharapat nege olardy aınalyp ótti?

Jalpy, mektep kitaphanashysy degen kim? Olar mektepke qaraı ma, joq, mádenıet salasynyń kitaphanalar júıesine qaraı ma? Aılyqtaryn mektepten alyp júrse de jańa jyldan bastap nege jalaqysy óskenderdiń qatarynan tabylmady? Sondyqtan eń aldymen mektep kitaphanashysynyń mártebesin anyqtap alý kerek sııaqty. Negizi joǵary oqý oryndarynda kitaphanashy mamandyǵy arnaıy oqytylady. Biraq mektep kitaphanashylarynyń qazirgi statýsy tehnıkalyq qyzmetkerlermen birdeı. Eń aldymen mekteptegi kitaphana meńgerýshisi, balalarǵa kitap berýshi, oqýlyqtardy túgendeýshi jáne sonymen birge dırektor buıyrsa, eden jýýshy, áınek súrtýshi, basqa da baryp kel, shaýyp kel jumystardy atqaryp kete beredi. Mektep kitaphanashylary dırektordyń aıtqanynan shyǵa almaıtynyn, tek sonyń buıryǵymen ǵana júrip-turatynyn osy maqalany daıyndaý barysynda anyq baıqadyq.

«Mektep kitaphanashylarynyń jalaqysy nege óspedi?» degen máseleni zertteý barysynda dál osy jaıt boıynsha ákimge hat jazǵan biraz kitaphanashylardyń aty-jónderin, telefon nómirlerin taptyq. Árıne, oıymyz osy máseleni bıliktiń nazaryna jetkizip, kitaphanashylarǵa kómektesý edi. Biraq ákimge «jalaqymyzdy kóterińiz» dep hat jazǵan kitaphanashylarǵa habarlasqanymyzda bári kúmiljip eshteńe aıta almady. Aıtpaq túgili «Meniń telefon nómirimdi sizge kim berdi?», «Gazetke meniń aty-jónimdi jazbaqshysyz ba?» dep ózimizge dúrse qoıa berdi. Úzip-julyp birdeńe aıtqandary keıinnen qaıtadan telefon shalyp «Alyp júrgen jalaqymyz 80-90 myń teńge ǵana, onyń ózine de zar bolyp qalamyz ba? Eshteńe jazbaı-aq qoıyńdarshy. Jazsańdar da meniń aty-jónimdi qospańdar. Tipti, maǵan habarlastym dep te jazbańdar. Tynyshtyq kerek» dep, jylarman boldy. Árıne, ákimge hat jazǵandar máselesin aqparat quraldaryna aıtý, aıtpaýy óz erkindegi sharýa ǵoı. Baısaldy túrde «Keshirińiz, aıta almaımyn» dese de eshkim zorlap aýzyna sóz salmas edi. Tipti, jaǵdaıdy túsindirip berip, «aty-jónimdi kórsetpeı-aq qoıyńdarshy» dese de, oǵan daýymyz bolmas edi. Degenmen de kitaphanashylardyń daýsyndaǵy úreı bizdi qatty oılandyrdy. Kitaphanashylar kimnen qorqady?

О́tken aptada bilim berý salasynyń qyzmetkerlerimen kezdesken Jambyl oblysynyń ákimi Berdibek Saparbaev mektep dırektorlary ózin menedjer emes, sol mekemeniń qojaıyny sııaqty sezinetinin ashyq aıtty. «Oqý oryndarynyń keıbir basshylary «meniń mektebim», «meniń ustazdarym», «meniń shákirtterim» degen sııaqty tirkesterdi qoldanyp, ózderin uıymdastyrýshy emes, menshik ıesi sekildi sezinedi. Mektep – memlekettiki, al dırektor – aýysyp otyratyn basqarýshy bolýy tıis» dedi B. Saparbaev.

Shynynda bizdiń keıbir mektepterdiń dırektorlary, ásirese, aýyldaǵy bilim oshaqtarynyń basshylary ózderin «qudaıdaı» sezinedi. Kitaphanashylar mine, sol dırektorlardan qoryqsa kerek. Árıne, ákimder «mektep kitaphanashylarynyń da jalaqysyn ósiremiz» dep ýáde bergen kórinedi. Biraq sol kitaphanashylar endi jalaqy ósirý máselesin sońyna deıin jetkizip, tabandap tura ala ma, joq, álde dırektor bir aqyrǵannan-aq «Osyǵan da shúkirshilik» dep jer sıpap kete bere me?..

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz