Joba qatysýshylary múmkindigi shekteýli jandardy qoǵamǵa beıimdeýge jáne olardyń tolyqqandy ómirin uıymdastyrýǵa baǵyttalǵan ınnovasııalyq sheshimder usynady. «TOM: Nur-Sultan» degen atpen bastaý alǵan meıkaton 3 kezeńde júzege asyrylady. Meıkaton formatynda ónertapqyshtar 72 saǵat ishinde óz úlgilerin usynýlary qajet.
Nur-Sultan qalasynyń Jastar saıasaty máseleleri basqarmasynyń basshysy Dáýlet Káribek kreatıvti ári daryndy jas ónertapqyshtar men múmkindigi shekteýli jandardyń basyn qosatyn bul alańda múgedekterdiń kúndelikti turmysynda kezdesetin kedergilerdi jeńýge baǵyttalǵan tyń tehnologııalyq sheshimder usynylatynyna senimdi.
Qazaqstan múgedekter konfederasııasynyń atqarýshy dırektorynyń orynbasary Aleksandr Horkın jobaǵa qatysý arqyly tobymen birge ózi sııaqty erekshe qajettiligi bar jandardyń ómirin jeńildetýdi kózdeıdi.
«Marafonda túrli sala mamandarynan quralǵan erekshe tobymyz bar, jobaǵa qatysý óz múmkindigimizdi kórsetý ǵana emes, áleýmettik kásipkerlikte ózimizdi synap kórý bolyp otyr. Osyndaı múmkindik úshin uıymdastyrýshylarǵa alǵys aıta otyryp, ózim sekildi jandardyń jańa qyryn tanytýǵa baǵyttalǵan jobalar kóp bolsa eken deımin»,- dedi A. Horkın.
Uıymdastyrýshylardyń biri Tel-Avıv ýnıversıtetiniń dostar qaýymdastyǵynyń vıse-prezıdenti Sanııa Arapova bıylǵy meıkatonnyń basty ereksheligi jańa kezińniń qosylýynda deıdi.
Jańa kezeńde joǵary oqý oryndary men kolledjder jobalaryn aýyzsha tanystyra alady. Bul elordadaǵy oqý oryndarynyń stýdentterin jobaǵa qatysýǵa shaqyrýǵa múmkindik bermek. Osylaısha uıymdastyrýshylar meılinshe kóp jasty ıgi bastamaǵa jumyldyrýdy kózdeıdi.
Shara Nazarbaev Ýnıversıtetiniń Innovasııalyq klasteriniń Fab Lab zerthanasynyń alańynda ótedi.
Qatysam deýshiler 2 naýryz - 1 sáýir aralyǵynda tirkele alady. Jobaǵa jeke nemese toppen qatysýǵa bolady.
Ideathon kezeńi osy jyldyń 11-13 naýryz kúnderi ótpek. Al 15 sáýir kúni ónertapqyshtar múmkindigi shekteýli jandarmen kezdesip, prototıpterdi daıyndaýǵa kirisedi. Sońǵy kezeńde 15-18 mamyr kúnderi 72 saǵat ishinde qazylar alqasyna daıyn jobalar tanystyrylady.
О́tken jyly Nur-Sultan qalasy ákimdiginiń qoldaýymen 7 komanda qatysqan meıkaton ótken edi. Sátti shyqqan eki prototıp paıdalanýǵa berildi.
Joba múgedek jandardyń máselesin sheship qana qoımaı, áleýmettik kásipkerli damytýdy maqsat etken.
