Tuńǵysh Prezıdent Nursultan Nazarbaevtyń Jarlyǵymen atalyp ótetin Alǵys aıtý kúniniń máni erekshe. Bul – taǵdyr tálkegimen Qazaqstan jerine eriksiz qonys aýdarǵan túrli etnos ókilderiniń qutty qonysyna aınalǵan qasıetti qazaq jeri men qonaqjaı qazaq halqyna tereń taǵzymnyń belgisi. Sonymen qatar aǵa urpaq ókilderine, ata-ana, týys-baýyrǵa shynaıy sezimmen rızashylyq bildiretin kún. Áskerı bólimniń qyzmetkeri, maıor Aıdyn Túsipjanov eń aldymen ózi qyzmet etetin bólimniń jumysy týraly tanystyryp ótti. Elimizdiń ońtústigi men soltústigi, batysy men shyǵysyndaǵy shekarasynda tótenshe jaǵdaı oryn alsa, bas –aıaǵy birer saǵatta baryp, qosymsha kúsh retinde jumylýǵa mamandanǵan áskerı bólimniń árbir sáti syn-qaterler men táýekelderden turady eken. «Bizdiń jumysymyzdyń ózi qupııa. Biz muny jarııaly túrde aıta almaımyz. Munda eliniń birtutastyǵyna ómirin arnaǵan erlerdiń esimin eli bilýi mindetti emes» dep sanaıtyn búgingi zamannyń batyrlary qyzmette dep senimmen aıta alamyn. Munda ásire patrıotızmmen ada, ózin-ózi jarnamalaýǵa jany qas, biraq ómirin, basynyń amandyǵyn eldiń birtutastyǵy men qaýipsizdiginen bóle-jara qaraı almaıtyn azamattar eldiń shebinde júr» dep atap ótti maıor Aıdyn Túsipjanov.
Osy jıynǵa irgedegi Almatydan kelgen Qazaqstan halqy Assambleıasynyń músheleri sóz alyp, Alǵys aıtý kúni qazaqstandyq patrıotızmniń, dostyq pen birligimizdiń, mádenı san alýandyǵymyzdyń jarqyn kúni ekendigin tilge tıek etti. Túrik mádenı ortalyǵynyń ókili, Qazaqbaı Kasımov Alǵys aıtý kúnin merekeleýdiń jańa dástúri «Máńgilik El» birligin ortaq tarıh jáne tarıhı sana negizinde nyǵaıtý men damytýdy kózdeıtinin aıtty.
«Osy kún taǵdyr toǵystyrǵan Qazaqstannyń kópetnosty halqynyń ortaq tarıhyn qurmetteıtin, qaıyrymdylyq dástúrlerin, áleýmettik yntymaqty jáne ózara kómek kórsetýdi qoldaıtyn kún. Bul – repressııa men jer aýdarý jyldarynda bizdiń halyq kórsetken meıirimdilik pen adamgershilik syndy rýhanı dástúrler kúni» dep atap ótti «Ahyska» túrik etnomádenı ortalyǵy tóraǵasynyń orynbasary Qazaqbaı Kasımov.
Sondaı-aq, ol Alǵys aıtý kúni qazaqstandyq patrıotızmniń, dostyq pen birligimizdiń, mádenı san alýandyǵymyzdyń jarqyn kúni ekendigin tilge tıek etti.
Aıtpaqshy, Qazaqstanda turatyn 130 ult ókilderiniń arasynda aýǵan ultynyń da ókilderi baryn osy jıynda bildik. Olardyń tipti «Arıanna» dep atalatyn mádenı ortalyǵy jumys isteıtinin bilgende tabaldyryǵynan attaǵan birer ultqa da mádenı ortalyq ashyp berýge asyq turatyn «qonaqjaılymyzǵa» taǵy da bir kóz jetkerdik. Osy ortalyqtyń basshysy Vostok Ahmattýlla osydan birneshe jyl buryn Aýǵanystannan kelip, Almatyda turaqtap qalypty. Keıin ózi tárizdi qazaq jerine kelip, turaqtap qalǵan aýǵandyqtardyń basyn qosyp, Qazaqstan halqy Assambleıasyna tirkelgen.
«Qazaqstan halqy Assambleıasy qurylǵan kún – 1 naýryzdy jyl saıyn barlyq etnostardyń bir-birine jáne meıirbandyq tanytyp, ol adamdardy óz týǵanyndaı qabyldaǵan qazaqtarǵa alǵys aıtý kúni retinde atap ótý ádiletti bolar edi. Osy kún bizdi bir-birimizge burynǵydan da jaqyndastyra túspek. Bul kúndi men meıirimdiliktiń, búkil qazaqstandyqtardyń bir birine degen dostyǵy men mahabbatynyń jarqyn merekesi dep qabyldaımyn. Alǵys aıtý kúni – Qazaqstan halqyn máńgilikke biriktirýge baǵyttalǵan «Máńgilik el» jalpyulttyq patrıottyq ıdeıasynyń, elimizdegi barlyq ult pen ulysty bir shańyraq astyna toptastyratyn Qazaqstan halqy Assambleıasynyń kúni, – dep atap ótti Vostok Ahmattýlla.
Jıyn sońy áskerı jaýyngerlerdiń Assambleıa múshelerimen erkin áńgime suhbatymen jalǵasty.
