Bilim salasyndaǵy jańa basqarý júıesi týraly oblystyq bilim basqarmasy basshysynyń mindetin atqarýshy Baǵdat Berdáýletov baıandama jasady. Onyń aıtýynsha jańa basqarý júıesi eki kezeńde júzege asyrylmaq.
Endi aýdan, qala ákimdikterindegi bilim berý salasyndaǵy fýnksııalar oblystyq basqarmaǵa berilmek. Osyǵan sáıkes, «Bilim týraly» Zańnyń 6-babyna ózgerister men tolyqtyrýlar engizilýde jáne 2021 jylǵy qańtardan bastap bilim salasyn qarjylandyrý oblystyq jergilikti atqarýshy organdardyń quziretine beriledi.
Al oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Talǵat Dúısebaev jańa formattaǵy ataýly áleýmettik kómek kórsetý baǵytyndaǵy jumystardan habardar etti.
1 qańtardan bastap AÁK alatyn eńbekke jaramdy adamdardy jumyspen qamtý úshin 4164 shara josparlanǵan, onyń 926 turaqty jumys oryndary. Búgingi kúnge AÁK alýshylar qataryndaǵy eńbekke jaramdy 11177 adamnyń 1652-i jumyspen qamtýdyń belsendi sharalaryna tartylyp, 39,8 paıyzy nemese 657 adam turaqty jumysqa ornalasypty.
Ataýly áleýmettik kómekti tek muqtaj otbasylar ǵana alýy tıis.
Oblys boıynsha 2 aıda ataýly áleýmettik kómek alýshylar qataryndaǵy eńbekke jaramdy adamnyń tek 39,8 paıyzy turaqty jumysqa ornalastyrylǵan. Eń tómengi kórsetkish Qazaly, Jalaǵash, Syrdarııa aýdandarynda. Qazaly aýdanynda ataýly áleýmettik kómek alatyn eńbekke jaramdy adamdardyń nebári 4,9 paıyzy ǵana jumyspen qamtýdyń belsendi sharalarymen qamtylǵan. Qazaly aýdany ákimdigi bul máseleni qatań baqylaýǵa alsyn. Sonymen qatar bıyl ótkiziletin sanaqqa baılanysty, Qyzylorda qalasy jáne aýdan ákimderi 2020 jyldyń 1 sáýirine deıin kóshelerdiń ataýlaryn, kvartaldardyń, úılerdiń jáne páterlerdiń nómirlerin retke keltirý jumystaryn aıaqtap jáne sharýashylyq kitabyndaǵy esepke alý derekteri boıynsha naqtylaý jumystaryn júrgizsin, dedi oblys ákimi.
2020 jylǵy halyq sanaǵyn ótkizýge daıyndyq jumystary týraly oblystyq statıstıka departamentiniń basshysy Marııam Baekeeva baıandama jasady.
Aımaq basshysy kún tártibinde qaralǵan máselelerge qatysty sala basshylaryna naqty tapsyrmalardy júktedi.
