Nurlan Nyǵmatýlın «Halyq densaýlyǵy jáne densaýlyq saqtaý júıesi týraly» Kodeks jobasy men oǵan ilespe zań jobasynyń barsha qazaqstandyqtarǵa qajetti de mańyzdy ekenin, osy Kodeks jobasy halyq arasynda kóp talqylanǵanyn atap ótti.
Depýtattarymyz aımaqtarǵa sapary kezinde de osy másele basty nazarda boldy. Arnaıy jumys toptary, keńeıtilgen otyrystar uıymdastyryldy.Osy Kodeks boıynsha densaýlyq saqtaý salasy mamandarynyń qatysýymen Májiliste «Nur Otan» partııasynyń fraksııa otyrysy da ótti. Osy sharalarda aıtylǵan barlyq usynystar, pikirler zań jobasyn qabyldaý kezinde eskerildi. Sonyń nátıjesinde Kodekstiń árbir normasy jan-jaqty talqylanyp, kóptegen suraqtar óz sheshimin tapty. Ásirese, sıfrlyq tehnologııany engize otyryp, medısınalyq qyzmettiń sapasyn kúsheıtý, donorlyq máselesi ana jáne bala densaýlyǵyn saqtaý, boıynsha ózgerister engizildi. Sonyń arqasynda densaýlyq salasynda burynǵydan bólek zaman talabyna saı jańa Zań maquldandy deýge bolady, - dedi Májilis Tóraǵasy.
Birinshi oqylymda maquldanǵan «Halyq densaýlyǵy jáne densaýlyq saqtaý júıesi týraly» Kodeks jobasy jumys berýshiler men jumyskerdiń densaýlyq úshin ortaq jaýapkershiligi men qoǵamdyq densaýlyqty saqtaýdy kúsheıtýge, medısınalyq tehnologııalardy damytýǵa, medısınalyq qyzmetter kórsetý, dárilik zattar men medısınalyq buıymdardyń aınalysy salalarynda baqylaýdy jetildirýge, medısına qyzmetkeriniń mártebesin arttyrýǵa baǵyttalǵan.
Kodekstiń jobasymen jumys isteý barysynda depýtattar jumys berýshiniń densaýlyq saqtaý organdaryna azamattardy qan, aǵzalar jáne tinder donorlarynyń qataryna tartý boıynsha járdemdesý mindetin, skrınıngtik medısınalyq zertteýlerden ótpegeni úshin eńbek etý quqyǵyn shekteıtin, sonymen qatar shetel azamattarynyń muqtajdary úshin Qazaqstannan aǵzalar men tinderdi shyǵarý múmkindigin belgileıtin normalardy alyp tastady. Budan basqa, 16 jasqa tolǵan kámeletke tolmaǵandarǵa ata-anasynyń kelisiminsiz medısınalyq jáne hırýrgııalyq aralasýdy júrgizýge tyıym salatyn túzetý qoldaý tapty.
