JО́NSIZ AQPARATQA NEGIZ JOQ

Qyzylaǵashtaǵy sý tasqynynan eldi mekenniń aıaǵyndaǵy Aqtoǵan men Eginsý aýylynyń halqy zardap shekkenimen adam shyǵyny bolǵan joq. Qazirgi kezde munda da qıraǵan úılerdi qaıta salý men zaqymdanǵan­daryn kúrdeli jóndeý bastaldy. Arnaıy tekserýden soń Eginsýdaǵy 26 úı  jańadan salynsa, 47 úıge kúrdeli jóndeý jumystary júrgiziletin boldy. Al, Aqtoǵan aýylynda 65 úı qaıta salynatyn bolsa, 37 úı jóndeý jumystaryn qajet etetini anyqtalǵan. Atalǵan eldi mekenderdegi turǵyn úıler men áleýmettik mádenı nysandardy qalpyna keltirýdi “Almaty qurylys”, “Obltıajstroı” mekemeleri bastap, jumys jáne tehnıka kúshi tartylyp, múmkindiginshe qurylysty qysqa merzimde aıaqtaýǵa jumylǵan. Tasqyn shaıǵan 13 shaqyrym sý qubyry júıesine arnaıy qondyrǵy ornatý maqsatynda 5900 metr or qazylyp, júıege qajetti qubyr ornatyldy. Halyqtyń azyq-túlik qaýipsizdigi men sýdyń sapasy oblystyq sanıtarlyq-epıdemıo­lo­gııalyq qadaǵalaý basqarmasynyń mamandary qajetti normaǵa sáıkestigi jaıly qorytyndy jasap otyr. Búgingi kúni Qyzylaǵashta tasqynnan qaza bolǵandar sany 44 adamǵa jetti. Áli de bir adam­nyń iz-túzsiz joǵalǵany jaıly týystarynyń shaǵymy boıynsha izdestirý jumystary jal­ǵa­sý­da. Qyzylaǵash, Aqtoǵan men Eginsý aýyldarynda 2742 bas maldyń óleksesi anyqtalyp, kómildi. Keıbir aqparat quraldary qurban bolǵandar­dyń qatary júzdep sanalady degeni shyndyqqa janaspaıtynyn jetkizgen oblys ákiminiń orynbasary Serik Muqanov quqyq qorǵaý organ­daryna jaqyn týystaryn izdep, aryz aıtýshy­lar­dyń keletinin  aıtty. Búgingi kúni bir azamat­qa qatysty izdestirý sharalarynan ózge ótinish tirkelmegen. Adam emes, maly joǵalsa izdeý salynatynyn eskersek, jónsiz aqparatqa negiz joq deýge bolady. Respýblıkalyq shuǵyl qutqarý otrıady men oblystyń sýdan qutqarý qyzmetindegiler ózen sa­ǵa­syndaǵy 15-20 shaqyrymdaǵy izdestirý ju­mys­taryn áli de jalǵastyryp keledi. Sonymen qatar №28237 áskerı bóliminiń 40-tan astam áskerı­leri “MI-171” tikushaǵymen ashyq alańdardy tekserip, iz-túzsiz ketken adamnyń denesin izdestirýde. Turǵyndardyń ótinishimen kóktemgi egiske baılanysty jer berý máselesi sheshilip, 45 sharýa qojalyǵy naýqanǵa qajetti tuqym, janar-jaǵarmaımen qamtamasyz etiletin boldy. Berilgen alqaptarǵa qant qyzylshasy, kókónis ósirý josparlansa, dıqandar kúzdik bıdaı sebýdi qolǵa alatyn boldy. Egistikti sýarý maqsatynda Qyzylaǵash sý qoımasyn qalpyna keltirýdiń qujattary jasalyp, qarjy bólindi. Oǵan deıin ózen sýyn paıdalaný arqyly egistik sýarylyp, bolashaq molshylyqqa berik negiz qalaý jumysy jalǵasýda. Kúmisjan BAIJAN, Almaty oblysy.