Kezdesýge Parlament depýtattary, densaýlyq saqtaý, ulttyq ekonomıka, qarjy mınıstrlikteriniń basshylary, «Áleýmettik medısınalyq saqtandyrý qory» kommersııalyq emes aksıonerlik qoǵamy men «Atameken» ulttyq kásipkerler palatasynyń, Nur-Sultan qalalyq emhanasy men Qaraǵandy oblysy, Osakarov aýdanynyń ortalyq aýdandyq aýrýhanasynyń, «Medıker Astana» seriktestiginiń jáne Senat Apparatynyń qyzmetkerleri qatysty.
Komıtet tóraǵasy Murat Baqtııarulynyń aıtýynsha, medısınalyq qyzmet kórsetýdiń sapasy men qoljetimdiligin jaqsartý, onyń básekelestik qabiletin arttyrý medısınalyq qyzmetterdiń tarıfterine tikeleı baılanysty. «Osy tarıfterdi qalyptastyrýda bizderdi tolǵandyratyn máseleler jetkilikti. Qarjylandyrýdyń joǵaryda atalǵan kózderi boıynsha medısınalyq qyzmetterge tarıfter qalyptastyrý qalaı júzege asýda jáne ol medısınalyq qyzmet kórsetýdiń sapasy men qoljetimdiligin jaqsartýǵa múmkindik bere me? Búgingi kezdesýimiz osy suraqtardy talqylaýǵa jáne olardyń sheshý joldaryn anyqtaýǵa arnalyp otyr», - dedi M.Baqtııaruly.
Densaýlyq saqtaý mınıstrliginiń jaýapty hatshysy Botagóz Jaqselekova medısınalyq qyzmetterdiń tarıfi memleketten bólinetin bıýdjet qarajaty men mindetti áleýmettik medısınalyq saqtandyrý qoryndaǵy qarjyny basshylyqqa ala otyryp belgilenetinin aıtty. «Qoldanystaǵy tarıfke sáıkes, medısınalyq qyzmettik tólem onyń túrine qaraı tólenedi. Jan basyna shaqqanda ambýlatorlyq-emhanalyq kómek erejege sáıkes 1024,78 teńgeni quraıdy. Bıyldan bastap halyqtyń tyǵyz ornalasý aımaǵyna qaraı tólem ózgerdi. Sondaı-aq, jedel medısınalyq kómektiń tarıfi de jan basyna oraı ereje boıynsha tólenedi. Al stasıonarlyq qyzmet kórsetetin medısınalyq qyzmet klınıkalyq shyǵyndar tobyna qaraı tólem júrgiziledi», - dedi B. Jaqselekova.
Senator Nurtóre Júsipti mindetti áleýmettik medısınalyq saqtandyrý qoryna kirmeı qalǵan azamattardyń jaǵdaıy tolǵandyrdy. «MÁMS qoryna kirmegen azamattar bar. Oǵan sebep jumys berýshilerdiń óz qyzmetkerlirine ýaqytyly tólemeýi. Osy olqylyqty joıý maqsatynda biz Qarjy mınıstrligi Memlekettik kirister komıtetimen birlesip jumystar atqarylýda. Biz olarǵa MÁMQ qoryna jarna tólemeı otyrǵan uıymdar men azamattardyń tizimin beremiz. Odan ári Kiris komıteti jumys jasaıdy. Aıdyń basynda tizim berip, aıdyń sońynda jaýap alyp otyrmyz. Bul Úkimettiń baqylaýyndaǵy másele», - dedi «Áleýmettik medısınalyq saqtandyrý qory» kommersııalyq emes aksıonerlik qoǵamynyń basqarma tóraǵasy Aıbatyr Jumaǵulov.
Depýtat Narıman Tóreǵalıev elimizdegi qymbat medısınalyq qural-jabdyqtardyń qoljetimdiligi máselesin kóterdi. «Búginde qymbat medısınalyq-dıagnostıkalyq qural-jabdyqtar biren-saran aýdandardy eseptemegende, kóbinese iri qalalar men oblys ortalyqtarynda ǵana qoljetimdi. Al qalǵan aýdan jáne aýyl turǵyndary iri qalalarǵa baryp emdelýine týra keledi. Endi qarap otyrsaq, tegin medısınalyq kómektiń kepildik berilgen kólemi sheńberinde jáne mindetti áleýmettik medısınalyq saqtandyrý júıesinde medısınalyq qyzmetterge baǵa belgileý tarıfinde bul másele aıtylmaǵan», - dedi N.Tóreǵalıev.
Densaýlyq saqtaý mınıstrliginiń ókili óz kezeginde aýdandyq jáne aýyldyq óńirlerde atalǵan problemalardyń baryn aıta kelip, bul máseleni sheshýde mınıstrlikpen qatar jergilikti atqarýshy organdar tarapynan múddeli bolýy kerektigin alǵa tartty.
Áleýmettik-mádenı damý jáne ǵylym komıtetiniń tóraǵasy Murat Baqtııaruly kezdesýdi qorytyndylaı kelip, mindetti áleýmettik medısınalyq saqtandyrý júıesin engizýdi sheshilýi tıis birqatar suraqtardy atap ótti. «Biz nege bul máseleni búgin qarap otyrmyz, sebebi medısınalyq qyzmetterdiń tarıfine qatysty suraqtar kóp. Erteńgi kúni qor jumysyna qatysty túrli táýekelder týyndaýy múmkin. Mysaly, bizde ózin-ózi qamtamasyz etip otyrǵan azamattar bar, olar MÁMS qoryna jarna tólemeıdi, erteń olardy jarnany tólemegen úshin aýrýhanalar men emhanalar qabyldamaýy múmkin. Bul úlken másele. Sondyqtan da mınıstrliktiń aldynda atqaratyn áli de birqatar jumystar bar», - dedi M.Baqtııaruly.
