Teatr ujymy Djordj Balanchınniń «Serenada» bir aktili baleti men «Uly dala murasy» dıvertısmenti engen tańdaýly baǵdarlamasyn tartý etpekshi.
HH ǵasyr baletiniń altyn qoryna engen «Serenada» - amerıkalyq horeograf Djordj Balanchınniń aıtýly týyndysy. 2017 jyly «Astana Balet» teatrynyń sahnasynda ótken premera elimizdiń mádenı tynysyndaǵy zor qubylysqa aınaldy. Sebebi, sol shaqta bul – kúlli Ortalyq Azııa aýmaǵynda Djordj Balanchın qorymen yntymaqta, horeograftyń stıli men tehnıkasynyń standarttaryn tolyq saqtaı otyryp qoıylǵan alǵashqy balet bolatyn. «Serenadany» qazaq sahnasynda qoıǵan Vıktorııa Saımon – amerıkalyq horeograftyń tól shákirti. Buǵan deıin ol álemniń túrli elinde Balanchınniń otyz shaqty spektaklin cahnalaǵan.
Ekinshi bólimde qazaq mádenıetiniń qyr-syryn áıgili etetin «Uly Dala murasy» baǵdarlamasy kórsetilmek. Qazaqstannyń eńbek sińirgen qaıratkerleri Aıgúl Tátı men Mýkaram Avahrıdiń árbir horeografııalyq mınıatıýrasy kóshpeli halyqtyń tanym kókjıegin aıǵaqtaıtyn týyndylar.
Osy baǵdarlamaǵa engen mınıatıýralar qazirgi qazaq horeografııasyn tanýǵa múmkindik beredi. Munda etnografııa elementteri, bı dástúri men zamanaýı horeografııalyq sheshimder úılesim tapqan.
«Uly Dala murasy» dıvertısmenti teatrymyzdyń gastroldik baǵdarlamalaryna dástúrli túrde engizilip otyrady. London, Mılan, Monako, Nıý-Iork syndy qalalar men ózge de elderde kórsetilgen baǵdarlama kórermenniń erekshe yqylasyna bólengen. Aıtalyq, brıtanııalyq «Taıms» ulttyq naqysh, ásem kostıýmder men qazaqstandyq ártisterdiń sheberligine tánti bolǵan.
«Biz Atyraýǵa kópten beri barmaqshy edik. Osy qala turǵyndary men qonaqtary ónerdi erekshe qasterleıdi. Sol sebepti biz gastrol baǵdarlamasyna Djordj Balanchınniń álemge áıgili «Serenada» bir aktili baleti men Teatrymyzdy daralap turǵan «Uly Dala murasy» baǵdarlamasyn qosyp otyrmyz. Ártisterimiz ben shyǵarmashylyq toptyń óneri atyraýlyq kórermen kóńilinen shyǵady degen úmittemiz», - dedi qoıýshy-baletmeıster Aıgúl Tátı.
Aıta keteıik, naýryzdyń 25-26 kúnderi astanalyq ujym dál osy baǵdarlamany Semeıdegi Abaı atyndaǵy teatr sahnasynda kórsetpekshi.
