– Qazirgi qazaq qyzdary burynǵydan da sulý. Biraq olar óz qadiri men baǵasyn bilmeı júr dep oılaımyn. Men «Qazaq qyzy» degen kitapty bastadym. Bul qadamyma bir oqıǵa túrtki boldy. Birde Nur-Sultandaǵy jıynda áriptesterimizben otyrǵanbyz. Esik jaqtan saqaly qaýǵadaı ózge ult azamaty qazaq qyzyn jetektep alyp kirdi. Onyń artynsha kirgen, qaryndary qampıǵan, saqal-murttary ósip ketken álgi azamattyń jerlesteriniń janynda da bir-bir qarakóz sińlilerim. Ishim órtenip, kózime jas keldi. Máseleniń mánjaıyn zerttedim. Sáti túsip, tipti álgi erkekten de suradym. Jasy kelgen men jıirkenetin sol azamatqa qazaq qyzynyń satylǵanyn bilip, júregim qan jylady. Biz qalaısha mundaı kúıge tústik? – deıdi Kúlııa Smaıylhanqyzy.
Áriptesimizdiń áıel zatynyń jumysbasty bolýyna qatysty da kózqarasy bólekteý. Qyzmettik dáýir – ýaqytsha, búgin qajet bolǵanymen, erteń jasyń kelgende kerek emes bolyp qalasyń, deıdi ol. «Áıeldiń ǵumyrynda barlyǵy shekteýli. Qyz dáýreniniń óz ýaqyty bar, ana bolý baqyty 40 jasqa deıin degen sekildi. Áıel zatynyń negizgi mıssııasy – ana bolý. Barlyǵyna úlgerý kerek. Qyzmet pen otbasy tańdaýǵa túsetin dúnıe emes. «Men qyzmet istep júrip, kúıeýge tımeı qaldym. Balaly bola almadym», deý durys emes. Ol seniń máseleń. Sebebi sen bir dúnıeni ekinshi nársemen shatastyryp almastyrdyń. Erteń qartaıǵanda aýzyńa sý tamyzyp, aqtyq saparǵa shyǵaryp salatyn, tabytyńdy kóteretin – perzentteriń. Ujymdas, áriptesteriń seni jumys ornyńnan shyǵaryp salmaıdy ǵoı. Osyny este ustaý kerek. Áıel bolýǵa, ana bolýǵa ýaqyt tappasań, eshkimge ókpeleýdiń qajeti joq», deıdi Kúlııa Smaıylhanqyzy. Jıyrma jyldan astam ýaqyt memlekettik qyzmette bolǵan, búginde kásipodaq salasynda júrgen ol barlyq ýaqytta múmkindiginshe qarapaıym bolýǵa tyrysqanyn aıtady. Eger atqarǵan qyzmetińniń halyqqa paıdasy tımese, nátıje shyqpasa oryndy bosatý qajet dep esepteıdi. Kóp balaly analarymyzdyń ákimshilikterge baryp, alańdarǵa shyǵyp, mıtıngiler uıymdastyryp júrgeni qazaq áıeline jaraspaıtyn qylyq ekenin aıtady. «Balasyn dalaǵa, dárethanaǵa tastaǵan bezbúırek anany kórsettik. Endi kóshege shyǵaryp, urandatyp jatyrmyz. Bala – Allanyń memleketke emes, saǵan bergen syıy! Qazirgi analarymyzdyń kóshege shyǵyp, keýdesin urǵylap «men kóp balaly anamyn», degeni durys emes. Qazaq kesir men eldiń kózi tımesin dep balanyń sanyn esh ýaqytta aıtpaǵan. Qudaı perzentten aıyrylyp qalýdan saqtasyn. Ana degen balanyń tileýin tilep, shúkirshilik etip, tynysh qana júretin jan. Eńbek etseń, mindetti túrde bereketi bolady. Kezinde bizdiń analarymyz 5 sommen-aq kún kórgen. О́kinishke qaraı, qazirgi analardyń kóbinde táýbe joq. О́zi úshin týǵan balalaryn memleketke mindet qylǵan analardan qorqamyn», deıdi Kúlııa Smaıylhanqyzy.
Túrkistan oblysy
