Infeksııa juqtyrǵan azamat 2020 jyldyń 2 naýryzynda Mońǵolııaǵa Máskeý-Ýlaanbaatar baǵytyna qatynaıtyn ushaqpen kelgen. Ol — bul elde ýaqytsha turýǵa tirkelgen 56 jastaǵy Fransııa azamaty. Odan alynǵan aldyn ala zertteýler nátıjesinde onyń «COVID-19» vırýsyn juqtyrǵany anyqtaldy.
Naýqas qazirgi ýaqytta Dornogov aımaǵynyń Ýlaanbadrah sumynynda (aýyl) ornalasqan «Areva» (mońǵolsha «Badrah enerjı») kompanııasynyń ǵımaratynda oqshaýlanǵany jaıly resmı derekkózder málimdep otyr.
Oqshaýlanǵan fransýz «Areva» kompanııasynda jumys isteıdi. Búgin tańerteńgi saǵat 6-da Tótenshe jaǵdaılar jónindegi arnaıy komıssııa basshysy, Premer-mınıstrdiń orynbasary О́lzıısaıhany Enhtúvshınniń keńsesinde shuǵyl jınalys ótkizip, naýqaspen áýe reısinde, qonaq úıler men poıyzda birge bolǵan azamattardy anyqtady. Jol qatynastaryn keler dúısenbige deıin toqtaýǵa sheshim qabyldady.
Bul jóninde Mońǵolııanyń Tótenshe jaǵdaılar jónindegi arnaıy komıssııanyń bastyǵy, premer-mınıstrdiń orynbasary О́lzıısaıhany Enhtúvshın: «Aldyn ala boljam boıynsha azamat koronavırýs juqtyrǵan. Alaıda qaıtadan test tapsyryp, rastaımyz. Eger jaǵdaı aýyrlaıtyn bolsa, Eýropaǵa ushatyn áýe resteriniń barlyǵyn toqtatamyz», - dedi.
Qýat Ýathan
