«2018 jyly jalpy quny 11,1 mlrd teńgeni quraıtyn atalǵan avtomobıl jolyn kúrdeli jóndeýge jobalyq-smetalyq qujattama ázirlengen edi. Alaıda, elimizdiń barlyq óńirlerinde avtomobıl joldaryn salý, rekonstrýksııalaý jáne jóndeý boıynsha tolyqqandy jumystar júrgizilip jatqanyn eskere otyryp, bıýdjettik qarajattyń shekteýliligine baılanysty bir ýaqytta barlyq jobalardy iske asyrý múmkin bolmady», - dep atap ótedi Úkimet basshysy.
Sonymen qatar Premer-Mınıstr atalǵan avtojoldyń tranzıttiń damýyna jáne jergilikti turǵyndardyń qatynaýyna mańyzy zor ekendigin eskere otyryp, jobanyń iske asyrylýyn bastaýǵa qarajat bólý máselesi bıyl respýblıkalyq bıýdjetti naqtylaý kezinde belgilengen tártippen qaralatyndyǵyn aıtady. «Kúrdeli jóndeý júrgizilgenge deıin osy avtojoldyń tehnıkalyq jaı-kúıi avtojoldardy kútip-ustaý aýqymynda oryndalatyn jol-jóndeý jumystarynyń esebinen saqtalatyn bolady», - dedi Asqar Mamın.
Aıta keteıik, Senat depýtattary saýaldarynda «Quryq-Jetibaı» tas joly óńir turǵyndarynyń sońǵy 15 jyl boıy kóterip kelgen eń ózekti, kún tártibinen túspeıtin sheshimin tabýdy talap etetin máseleleriniń biri bolyp otyrǵandyǵyn atap ótedi. «Bul joldy, halyqaralyq kólik dálizi deýge de bolady.
Sebebi elimizdiń tranzıttik jáne eksporttyq áleýetin arttyratyn Quryq portyna keletin júkter, tap osy baǵytta Reseı men О́zbekstannan tasymaldanady. Eger, kórshi elderden keletin iri júk tasymaldary Aqtaý qalasyn aınalmaı, Jetibaıdan týra jolmen Quryq portyna qatynasa, 120 shaqyrymdy únemdeıtini anyq. Quryq-Jetibaı tas jolyn kúrdeli jóndeý jobalyq smetalyq qujaty 2018 jyly ázirlengen. Memlekettik saraptamasy bar», - dedi senatorlar.
