Sapar barysynda Elbasy Nursultan Nazarbaev Reseı Prezıdenti Vladımır Pýtınmen kezdesti. Taraptar EAEO aıasyndaǵy áriptestik máselelerin talqylady.
Elbasy Reseı Qazaqstannyń barlyq saladaǵy senimdi seriktesi bolyp qala beretinin atap ótti.
– Integrasııalyq birlestik jumys istep tur jáne bolashaǵy zor dep sanaımyn. Qurmetti tóraǵa retinde men onyń odan ári damýyna kúsh salamyn, – dedi Nursultan Nazarbaev.
Elbasy eki eldiń ózara qarym-qatynasy tatý kórshilik pen odaqtastyq qaǵıdattaryna tolyq sáıkes damyp kele jatqanyn sóz etti.
Sonymen qatar Nursultan Nazarbaev pen Vladımır Pýtın ǵylym-bilim salasyndaǵy yntymaqtastyq máselelerine erekshe mán berdi.
О́z kezeginde Vladımır Pýtın Qazaqstannyń Tuńǵysh Prezıdenti ıntegrasııalyq úderisterdi damytýǵa jáne eki el arasyndaǵy strategııalyq áriptestikti nyǵaıtýǵa súbeli úles qosqanyn atap ótti.
– Bizde saıası dıalog jalǵasyp jatyr. Biz Prezıdent Qasym-Jomart Toqaevpen udaıy kezdesip turamyz. Elderimizdiń úkimetteri úılesimdi jumys isteýde. О́tken jyly taýar aınalymy 19,7 paıyzǵa ósip, 20 mlrd dollarǵa jetti. Bul – jaqsy kórsetkish, – dedi Reseı Prezıdenti.
Sondaı-aq taraptar halyqaralyq kún tártibindegi ózekti máselelerdi talqylady jáne álemdik kómirsýtek naryǵynda qalyptasqan jaǵdaı boıynsha pikir almasty.
Osy jumys saparynyń barysynda Elbasy Nursultan Nazarbaevtyń M.V.Lomonosov atyndaǵy Máskeý memlekettik ýnıversıtetine barýy josparlanyp otyr.
Orynbek О́TEMURAT,
«Egemen Qazaqstan» – Máskeýden (Reseı)
