«QTJ» ulttyq kompanııasynyń ınnovasııalar men bilimdi basqarý salasyndaǵy saıasaty ıdeıa generasııasyn yntalandyrý jáne qolaıly ınnovasııalyq orta qalyptastyrý boıynsha júıeli sharalardy jasaýǵa baǵyttalyp otyr. S.Myńbaev atap ótkendeı, qyzmetkerler óndiriske ınnovasııany engizýde kompanııanyń negizgi qozǵaýshy kúshi sanalady. On jyl ishinde ekonomıkalyq tıimdiligi 1,3 mlrd teńgeden asatyn 12 myńnan astam utymdy usynys tirkelgen. Al 2019 jyly ekonomıkalyq tıimdiligi 61 mln teńgeni quraıtyn 986 usynys óndiriske engizilipti. Osy rette, kompanııanyń jas qyzmetkerlerin ınnovasııalyq proseske tartýǵa «Menedjment jobasy» baıqaýy zor múmkindik bergeni aıtyldy. Sala qyzmetkerleriniń ónertapqyshtyq qyzmetin odan ári damytý jáne qoldaý aldaǵy ýaqytta da jalǵasyn taba bermek.
– Búginde bizde 570 talgo vagony bar. Barlyǵy tolyq jumys isteıdi. Jergilikti qyzmet kórsetý de ulǵaıtyldy. Biz qyzmet kórsetý kelisimshartynyń baǵasyn barynsha arzandattyq. Bıyl kompanııa tarıftik júk aınalymynyń kólemin 226,4 mlrd tekshe nettodan tómen emes, ıaǵnı ótken jylǵy kólemnen 1% artyq oryndaý mindetin alǵa qoıyp otyr. Bul tapsyrmany júk tıeý kólemin arttyrý esebinen oryndaý mejelenýde. Sandyq kórsetkishtermen qatar sapalyq kórsetkishti jaqsartý, ıaǵnı tartymdyq jyljymaly quramdy tıimdi paıdalaný jumystaryn jalǵastyrý kózdelip otyr, – dedi S.Myńbaev.
Onyń aıtýynsha, eńbek ónimdiligin arttyrý jáne kompanııanyń damý men ońtaılandyrý saıasatyn júzege asyrý maqsatynda «Sıfrly transformasııa» baǵdarlamasynyń josparlaryn iske asyrý jalǵasady. Temir jol ınfraqurylymyn damytý baǵytynda bıyl 495 shaqyrym jolǵa kúrdeli jóndeý jumystary júrgizilýge tıis. Onyń ishinde, jyldyq jospardyń 68 paıyzy tranzıttik poıyzdar júretin joldardyń tehnıkalyq jaǵdaıyn jaqsartýǵa baǵyttalyp otyr.
Sonymen qatar ol 3-shi, 4-shi dárejeli aqaýly joldardyń kem-ketigin ýaqytyly túzemeý nemese túzese de sapasy syn kótermeýi «joldaǵy dúmpý» oqıǵalaryna ákelip otyrǵanyn tilge tıek etti. Áıtse de qozǵalys qaýipsizdigi revızorlary júrgizgen tekserýler tıimdi ári nátıjeli bolǵan. Tekseristiń nátıjesinde tehnıkalyq quraldardyń isten shyǵýy kemip, poıyzdardyń keshigýi azaıa túskeni osyǵan dálel.
О́tken jyly revızorlyq apparat tarapynan 7 myńnan astam tekseris júrgizilip, 90 myńǵa jýyq sáıkessizdik anyqtalǵan. Sondaı-aq 500 qyzmetker attestasııalaýdan óte almaǵan.
Jıyn sońynda Saýat Myńbaev koronavırýsqa qaramastan Qazaqstan Qytaımen aradaǵy júk tasymalyn toqtatpaıtynyń aıtty. Dese de aqpan aıynda tranzıt kólemi 39 paıyzǵa azaıǵan. «Bul qomaqty kórsetkish, QTJ-nyń qarjylyq ahýalyna áser etetini sózsiz, sebebi konteınerlik tranzıt biz úshin paıdaly», dedi ol. Kompanııa basshysy aldaǵy ýaqytta júk aınalymyn ulǵaıtýǵa kúsh salatynyn jetkizdi.
Muhtar KÚMISBEK,
«Egemen Qazaqstan»
