Aldymen Qazaqstan men Brazılııa arasyndaǵy qylmyskerlerdi ózara ustap berý týraly shartty ratıfıkasııalaý usynyldy. Qazaqstan Respýblıkasy Bas prokýrorynyń orynbasary Marat Ahmetjanovtyń aıtýynsha, búginde Qazaqstan men Brazılııa eli arasynda qylmys salasyna qatysty negizgi 3 shart jasaldy. «Atalǵan shart izdeýde júrgen adamdardy qylmystyq jaýapkershilikke tartý jáne sot úkimin oryndaý úshin sonymen qatar ekstradısııalaý máselelelerin sheshedi. Qujatta adamdardy ustap berý jáne odan bas tartý máseleleri belgilengen», - dedi M.Ahmetjanov.
Senator Rysqalı Ábdikerov atalǵan zań jobasyn ratıfıkasııalaýdy qoldaı otyryp, sharttyń eki el arasynda izdeý salynǵan adamdardy qylmystyq jaýapkershilikke tartý men azamattardy ekstradısııalaýǵa baǵyttalǵanyn aıtyp ótti.
Keńeıtilgen otyrysta sonymen qatar eki el arasynda qylmystyq ister boıynsha quqyqtyq kómek shartyn ratıfıkasııalaý týraly zań jobasy da talqyǵa salyndy. Bul shartty ratıfıkasııalaý eki el arasyndaǵy kúdiktiler men aıyptaýshylardyń kinásin dáleldeý úshin qajetti tergeý amaldaryn júrgizýdi kózdeıdi. Shartta quqyqtyq kómek qandaı jaǵdaılarda kórsetiletini jazylǵan jáne qujattyń áleýmettik, ekonomıkalyq jáne saıası teris saldary joq.
Qosymsha baıandama jasaǵan Senat depýtaty Nurlan Beknazarov azamattardyń jazany óz elimizde ótegeni qoǵamǵa qaıta beıimdelýine múmkindik beretinin atap ótti. Sol sııaqty sottalǵan azamattardy áleýmettik jaǵynan ońaltýǵa oń áserin tıgizedi.
Qazaqstan men Brazılııa arasynda ózara sottalǵan adamdardy berý týraly shartty ratıfıkasııalaý da usynyldy. Usynylyp otyrǵan shart jazasyn ótep jatqan qylmyskerlerge jazasyn óz elinde óteýge múmkindik beredi. Qazaqstan Respýblıkasy Bas prokýrorynyń orynbasary Marat Ahmetjanovtyń aıtýynsha, shartty ratıfıkasııalaý sheteldegi óz azamattarymyzdy qorǵaý maqsatyn kózdeıdi.
Komıtet basshysy Vladımır Volkov keńeıtilgen otyrysty qorytyndylaı kelip, elimiz táýelsizdik alǵaly 29 elmen osyndaı ekijaqty shart jasalǵanyn jetkizdi. «Qazirgi ýaqytta bizdiń azamattar shetelde jıi shyǵady. О́kinishke qaraı, keleńsiz jaǵdaılarǵa da ushyrap jatady. Sondaı jaǵdaıda osy sharttyń quqyqtyq kómegi tıedi», - dedi V.Volkov.
Zań jobalary Senattyń jalpy otyrysynda qaraýǵa usynyldy.
