Sábıge qoıylǵan dıagnoz aýyr sanatyna jatady. Atap aıtqanda, jalpy jaǵdaıy bas mı qan aınalysynyń buzylysy, bas mıynyń isinýi, tamyr ishindegi taralǵan qan uıý sındromy, postegorragııalyq anemııa, otadan keıingi erte kezeńge baılanysty óte aýyr, turaqsyz bolǵandyqtan aq halatty abzal jandar shuǵyl túrde ota jasaý týraly sheshim qabyldaǵan.
Anestezıologııa, reanımasııa jáne qarqyndy terapııa bólimshesiniń meńgerýshisi Mereke Bekbaevtyń aıtýynsha, sábıdiń sanasy mılyq koma, bet pishini jáne kóz sańylaýy sımmetrııaly bolǵan. Sonymen qatar menıngealdyq sımptomdary kúmándi jáne mıkrosırkýlıasııalyq buzylystar baıqalǵan. Teri jamylǵysy óte bozǵylt, sarǵysh bolǵan. Al otany balalar neırohırýrgi Erbol Kenjevalov jasaǵan.
- Náreste kúndizgi 12:30 shamasynda jedel járdem brıgadasymen balalar aýrýhanasyna jetkizildi. Balanyń jalpy jaǵdaıynyń aýyrlyǵyna .baılanysty bas mıynyń kompıýterlik tomografııasy jasalyp, jan saqtaý bólimshesine aýystyryldy. Tolyq tekserilgen soń otaaldy daıyndyqtan keıin 6 saǵattań soń operasııa jasaldy. Bas mıynyń ashylýy trepanasııasy jasalyp, gematomasy alyndy. Ota 1,5 saǵatqa jalǵasty. Qazirgi tańda sábı jasandy tynys alý apparatyna qosylǵan. Osylaısha konservatıvti emin jalǵastyrýda, deıdi ol.
Sábı ázirge dárigerlerdiń baqylaýynda bolady, aýrýhanada qansha kún jatyp em alatynyn dóp basyp aıtý qıyn. Oǵan bolashaqta da medısınalyq kómektiń qajet bolýy múmkin. Jaǵdaıy jaqsarǵan soń úıine jiberiledi. Aq halatty abzal jandar sábıge muqııat kútim jasalsa, jaǵdaıy jaqsaryp bul dıagnozdy tolyqqandy jeńýge bolatynyn aıtady.
