Quramynda Energetıka mınıstri Nurlan Noǵaev, Qazaqstan Respýblıkasy Prezıdentiniń kómekshisi Qanat Bozymbaev, «QazMunaıGaz» UK AQ Basqarma tóraǵasy Alık Aıdarbaev, sondaı-aq Densaýlyq saqtaý mınıstriniń orynbasary Kamaljan Nadyrov, Indýstrııa jáne ınfraqurylymdy damytý mınıstriniń orynbasary Amanııaz Erjanov, Ulttyq ekonomıka mınıstriniń orynbasary Ermek Alpysov, Eńbek jáne halyqty áleýmettik qorǵaý mınıstrligi komıtet tóraǵasynyń orynbasary Tólegen Ospanqulov bar delegasııa 13 naýryzda Mańǵystaý, Atyraý, 14 naýryzda Aqtóbe, Batys Qazaqstan oblystarynda boldy.

Vıse-premer bastaǵan jumys toby saparynyń basty maqsaty – óńirdegi munaıgaz sektorynda jumys isteıtin kompanııalarda qysqartý qaýpin zertteý jáne koronavırýs taralýy jaǵdaıynda medısınalyq mekemelerdiń daıyndyǵymen tanysý bolatyn.

Úkimettik delegasııa Batys Qazaqstan oblysynda bolǵan kezinde oblys ákimi Ǵalı Esqalıev delegasııa múshelerin óńirdegi áleýmettik-ekonomıkalyq jaǵdaımen jáne munaı-gaz salasyndaǵy kásiporyndar jumysynyń ózekti máselelerimen tanystyrdy.

Oblys kásiporyndarynda jaǵdaı turaqty. Kásiporyndar qalypty rejımde jumys istep tur. Aımaqtaǵy iri munaı-gaz jobalarynda COVID-19 jaǵdaıyna jáne valıýta baǵamynyń ózgerýine baılanysty shtat sanyn qysqartý josparlanbaıdy. Oblys ákiminiń aıtýynsha, búginde oblysta sheteldik jumys kúshin tartatyn 108 kásiporyn men uıymda barlyǵy 19 024 adam jumys isteıdi. Sońǵy jyldary otandyq mamandardyń úlesi 94% -ǵa (17764) deıin ósti, al sheteldik mamandardyń úlesi 6% -ǵa (1260) deıin tómendedi.

– Munaı baǵasynyń arzandaýy álemdik ekonomıkalyq ahýaldy kúrdelilendirip otyr. Buǵan koronavırýs epıdemııasynyń ýshyǵýy da qosyldy, – dedi Eraly Toǵjanov. Biraq Premer-Mınıstrdiń orynbasary elimizde áleýmettik turaqtylyq pen ult densaýlyǵy máselesi Prezıdent pen Úkimettiń basty nazarynda ekenin aıtty.

– Barlyq áleýmettik mindettemeler der kezinde oryndalady. Eldimekenderdi abattandyrý, ınfraqurylymdardy jóndeý, sol arqyly eńbek naryǵyn rettep, jumyssyzdyqqa jol bermeý úshin arnaıy jol kartasy daıyndalýda. Sonyń ishinde jumyssyzdardy, qysqartýǵa ushyraǵan eńbekkerlerdi jumyspen qamtýǵa erekshe kóńil bólinedi, - dedi Eraly Toǵjanov.

– Batys Qazaqstan oblysy ekonomıkalyq jaǵynan monoóńir, ıaǵnı munaıgaz sektoryna barynsha táýeldi. Osyǵan oraı biz álemdegi munaı baǵasy tóńiregindegi ahýalǵa qatty alańdap otyrmyz, - dedi Ǵalı Esqalıev.

О́ńirdegi munaı kenishterin ıgerý jáne kapıtaldy qurylys boıynsha jyl basynda bekitilgen jospar saqtalyp otyr. Degenmen, Qazaqstan tóńiregindegi barlyq jaǵdaıǵa turaqty monıtorıng júrgizilip otyr. О́ıtkeni ákimniń aıtýynsha, óńir kásiporyndaryna syrtqy áserden bolatyn barlyq táýekel eskerilýi tıis.

Oblys ákimi óńirdiń orta bolashaqtaǵy josparynda «JaıyqMunaı» JShS gazóńdeý qurylǵylaryn iske qosý, Qarashyǵanaq jobasyn keńeıtý boıynsha bastalǵan jumystardy aıaqtaý, «Ýral Oıl end Gaz» JShS qolǵa alǵan Rojkov kenishindegi jumysty bastaý, «Zhaik Petroleum» JShS jobasy boıynsha metanol óndirisin bastaý bar ekenin aıtty. «ABS Mýnaı» JShS salýy tıis MО́Z qurylysynda keıbir túıtkilder bar. «Sot talqylaýlary aıaqtalǵan soń nysannyń qurylysy qaıta jandanady dep senemin», dedi Ǵalı Esqalıev.

Batys Qazaqstan oblysynda 2020 jyly III jáne IV kategorııaǵa jatatyn sheteldik jumys kúshin ákelý kúrt qysqarǵan bolatyn. QPO b.v. kompanııasymen aradaǵy kelisimge sáıkes, óńirdegi munaıgaz kompanııalary standarttaryna saı keletin jergilikti mamandardy daıarlaıtyn trenıng ortalyqtar qurylatyn boldy.

Sondaı-aq ımporttyq-eksporttyq kelisimderdiń azaıýy múmkin jaǵdaıynda óńiraralyq kooperasııany bir ortalyqtan úılestirý máselesi de kóterildi. Bızneske arnalǵan nesıelerdi tóleý boıynsha mursat berý máselesi de aıtyldy.

Kezdesýde óńirdegi kásiporyn ókilderi de ózderin mazalaǵan saýaldardy ortaǵa saldy. Mysaly, 400-den asa adam jumys isteıtin «Kondensat» aksıonerlik qoǵamynyń munaı óńdeý zaýyty óndiristik qýatynan tómen jaǵdaıda jumys istep tur. Memlekettik tapsyrys áli bekitilmegendikten, «Zenıt» zaýyty jáne keıbir kásiporyndar jobalaryn der kezinde bastaı almaı otyr, bul óz kezeginde jumysshylardyń eńbekaqysyna tikeleı áser etedi.

Munaıgaz servısi kásiporyndarynyń qaýymdastyǵy kompanııa turyp qalǵan kezde jalaqynyń bir bóligin saqtaýdy, Qazaqstanda jumys istep jatqan I jáne II kategorııaly sheteldik mamandardyń kvotasyn uzartýdy surady.

Úkimettik delegasııa músheleri kásiporyn ókilderiniń saýaldaryna jaýap berip, munaı baǵasynyń tómendeýi men koronavırýstyń taralýynan týyndaıtyn zardaptardy barynsha azaıtý boıynsha memleket tarapynan jasalatyn keshendi sharalardy atap ótti.

Jıyndy qorytyndylaǵan Qazaqstan Respýblıkasy Premer-Mınıstriniń orynbasary Eraly Toǵjanov oblys ákimdigi men memlekettik organdardy paıdaly qazbalardy paıdalanýshylarmen birige otyryp, eńbek daýlarynyń aldyn alýǵa, jumys oryndaryn saqtaýǵa jáne kásiporyn jumysshylaryna eńbekaqyny der kezinde tólep otyrýǵa tapsyrdy.

Osy sapar kezinde Qazaqstan Respýblıkasy Premer-Mınıstriniń orynbasary ár oblystaǵy týberkýlezge qarsy dıspanserlerde jáne juqpaly aýrýlar aýrýhanalarynda da arnaıy bolyp, jaǵdaımen tanysty. Sonyń ishinde Batys Qazaqstan oblysynda barlyq medısınalyq uıymdar jeke qorǵanys quraldarymen, dári-dármektermen jáne qajetti dezınfeksııalyq quraldarmen qamtamasyz etilgen. Qazaqstan Respýblıkasy Úkimetiniń rezervinen dári-dármekter men medısınalyq maqsattaǵy buıymdardy satyp alýǵa 38,9 mln. teńge bólindi. Oblysta ınfeksııalyq, aldyn-alý jáne karantındik oryndar anyqtaldy. Oblystyń medısınalyq mekemelerinde 194 tósek ornalastyrylǵan.

Batys Qazaqstan oblysynda koronavırýstyq ınfeksııaǵa kúdiktelgen naýqastar joq. Basqa elderden kelgenderge táýlik boıy monıtorıng júrgizilýde.

Vıse-premer óńirdiń epıdemıologııalyq ahýalyn qatań baqylap, qajetti emdik quraldarmen qamtýdy, medısınalyq mekemelerdi tıisti qural-jabdyqpen qamtamasyz etýdi tapsyrdy.

Bes óńirge jasaǵan saparynda Eraly Toǵjanov oblys ákimderine elde buqaralyq mádenı jáne sporttyq is-sharalarǵa ýaqytsha tyıym salý, shekteýli oryndarda sanıtarlyq rejımdi nyǵaıtý jáne basqa da aldyn alý sharalaryn júzege asyrýdy erekshe baqylaýǵa alýdy tapsyrdy. Sonymen qatar azamattardy azyq-túlikpen jáne qajetti taýarlarmen úzdiksiz qamtamasyz etýdi tapsyrdy.

Batys Qazaqstan