Aýyl sharýashylyǵy basqarmasynyń basshysy Jansultan Táýkenovtiń aıtýynsha, oblystaǵy saýda oryndarynda jalpy kólemi 64 myń tonnadaı azyq-túlik bar. Budan ózge óńirlik turaqtandyrý qorynda 9,1 myń tonna azyq-túlik saqtaýly. Áleýmettik mańyzy joǵary 19 azyq-túlik túriniń ekeýi ǵana oblysqa syrttan ákelinedi. Qant pen taýyq jumyrtqasynan ózge azyq-túliktiń barlyǵy jergilikti kásiporyndarda óndiriledi.
Oblys ákimi Arhımed Muhambetov tıisti sala basshylaryna ýaqytsha jaǵdaıdy paıdalanyp, azyq-túlik baǵasyn negizsiz kóterip jibergen kásiporyndar men saýda ortalyqtaryna qatysty qatań shara qoldanýdy qadap tapsyrdy.
Básekelestikti qorǵaý jáne damytý jónindegi departament basshysynyń aıtýynsha, qazir oblysta qaraqumyq pen et baǵasyn negizsiz kótergen eki kásipkerge qatysty tergeý júrip jatyr.
Turaqtandyrý qoryna jaýapty «Tobyl» áleýmettik-kásipkerlik korporasııasy kelisimshart arqyly barlyq iri eldi mekenderdegi 120 saýda ornyn áleýmettik mańyzy bar azyq-túliktiń 15 túrimen qamtamasyz etip keledi. Alaıda bulardyń ishinde eldegi jaǵdaıdy jeleý etip, baǵany negizsiz qymbattatyp jibergen dúkender anyqtalyp otyr. Máselen, Tobyl qalasyndaǵy «Emma» dúkeni turaqtandyrý qorynan arzanǵa alǵan jumyrtqany 26 teńgeden satqan.
– Biz olarmen ári ketkende 10 paıyz ústeme qosý týraly memorandýmǵa qol qoıdyq qoı. Qazir ýaqyt basqa, mundaılarǵa neǵurlym qatań shara qoldanbasa bolmaıdy. Keshe oblys ortalyǵyndaǵy negizgi saýda ortalyqtaryna baryp kórdim. Kezek bar, biraq qoımadaǵy azyq-túlik qory da jetkilikti. Búgin orynbasarlarym men Qostanaı qalasynyń ákimi birqatar kóterme saýda ornyn aralaıdy, - degen Arhımed Muhambetov, - bastysy, eldi eń qajetti azyq-túlikpen jetkilikti túrde qamtamasyz etip, baǵanyń turaqtylyǵyn saqtaý qajet ekendigin qadap aıtty. Aımaq basshysy jıyn sońynda baǵany turaqtandyrý sharalaryna salǵyrt qaraǵan sala basshylaryn synap, qatań eskertý jasady.
Oblysta baǵany turaqtandyrý sharalary áli de kúsheıtilip, saýda oryndary jiti baqylaýǵa alynatyn bolady. Jyl basynan beri bul maqsatta 66 jármeńke uıymdastyrylyp, jergilikti kásiporyndar óndirgen 451 tonna azyq-túlik naryq baǵasynan 15-20 paıyzǵa arzan saýdalanǵan.
QOSTANAI
