Aqpan aıynyń sońǵy onkúndiginen beri aýrý belgisi baıqalǵan memleketterden kelgen 151 adamnyń 47-si provızorlyq stasıonarda bolǵan. Úı jaǵdaıynda baqylaýǵa alynǵandary da bar. Qazir olardyń barlyǵy stansıonardan shyqty. Oblystyq juqpaly aýrýlar aýrýhanasynda Germanııadan boıynda koronavırýs belgisi bar azamatpen birge ushyp kelgen serbııalyq jatyr.
– Zertteý nátıjesi onyń dertke shaldyqpaǵanyn kórsetti. Biraq ol talapqa sáıkes eki apta boıy bizdiń baqylaýymyzda bolady, – dedi oblystyq densaýlyq saqtaý basqarmasynyń basshysy J.Ábdýsámetov.
О́ńirde aýrý anyqtalǵan jaǵdaıda naýqasty emdeý, onymen qarym-qatynas jasaǵan adamdardy baqylaý maqsatynda qajetti oryndar jabdyqtaǵan. Dárilik preparattar men qorǵanysh buıymdary da jetkilikti.
Brıfıngte kásipkerlik nysandar, bilim berý uıymdary, mádenı oryndardyń tótenshe jaǵdaı rejıminde jumys isteý tártibi jaıly da sóz boldy.
Oblystaǵy aýmaǵy 2 myń sharshy metrden asatyn otyzǵa jýyq iri saýda alańdary halyqqa tańǵy saǵat 10.00-den keshki saǵat 18.00-ge deıin ǵana qyzmet kórsetedi. Sanıtarlyq qaýipsizdik talaptary qatań saqtalady. Saýda ortalyǵynyń aýmaǵyndaǵy kınoteatr, balalar ortalyǵy, oıyn-saýyq alańdary jabyldy.
Oblystyq kásipkerlik jáne týrızm basqarmasynyń basshysy Ferdoýsı Qojabergenov óńirdegi 189 qoǵamdyq tamaqtaný ornynyń jumys rejımi qatań baqylaýda turǵanyn aıtty. Toı-tomalaq ótkizýge tyıym salynýyna baılanysty toıhanalar jumysyna da shekteý qoıylǵan.
