Is-sharany Soros-Qazaqstan Qorynyń qoldaýymen Urban Forum Kazakhstan uıymdastyrdy.
Kólik qala damýynda asa mańyzdy ról oınaıdy, sol sebepti qalalar kólik jobalary men ınnovasııalyq baǵdarlamalarǵa úlken úmit artady. Sońǵy on jylda Almaty turǵyndarynyń kólik aıdaý deńgeıi jyl saıyn shamamen 10 paıyzǵa artyp otyrdy. Qalanyń keńeıip, qala mańynyń damýy keptelisterdiń ulǵaıýyna ákelip, bul qarbalas qozǵalys ýaqyttarynda ǵana emes, sonymen birge, túski ýaqytta da úlken máselege aınaldy. Keptelister qorshaǵan ortaǵa zııan kelitirip qana qoımaı, qala ekonomıkasyna da zalal keltirip otyr. Máselen, sarapshylardyń esepteýinshe, tek 2013 jyldyń bir ózinde keptelister sebepti qala ekonomıkasy kún saıyn 210 mln. teńge mólsherinde shyǵynǵa batqan. Almaty basty kólik máselelerin sheshý úshin sońǵy 7 jyl ishinde qandaı sheshimder qabyldady, bul tájirıbeni basqa qalalardyń tájirıbesimen qalaı salystyrýǵa bolady?
Urban Forum Kazakhstan kólik jónindegi mamany Roman Barabanov qujatta keltirilgen mysaldar qala kólik sektorynyń kólik ınfraqurylymyn jáne de jerdi paıdalaný salasyn sapaly túrde uzaq merzimdi josparlaýǵa qatty táýeldi ekendigin aıtady.
«Qalany damytý strategııasy deńgeıinde qoǵamdyq kóliktiń jeke kólikke qaraǵanda basymdyǵyn belgileý qajet. Sondaı-aq, aýmaqtarda qurylys júrgizý úshin ruqsat berý kezinde Qala mobıldiligi basqarmasy, Qalany josparlaý jáne ýrbanıstıka basqarmasy, Qala qurylysyn baqylaý basqarmasy arasyndaǵy áreketterdi úılestirý qajettiligi asa ótkir bolyp tur» dedi.
Ruqsattardy berý kezinde jańa nysannyń kólik jelisine áserin, sondaı-aq, qoǵamdyq kólikke degen suranysty qanaǵattandyrý múmkindigin baǵalaý mindetti bolýy tıis» deıdi ol búgin ótip jatqan onlaın rejımindegi jıynda. Kólik jónindegi mamandar qala ákimshiligi turaqty mobıldilikti ilgeriletý, qala kólikterinen aýaǵa shyǵarylatyn qaldyqtardy tómendetý jáne azamattardyń qandaı kólikke artyqshylyq beretindigin túsiný úshin qandaı sharalardy qabyldap jatqandyǵyna taldaý júrgizdi. Esepte Almatynyń mysalynda kólik saıasatyndaǵy sheshimderge, sondaı-aq, Almatynyń jergilikti tájirıbesin damyǵan jáne damyp jatqan elderdiń tájirıbesimen salystyrýǵa erekshe mán berildi.
Sarapshy Elena Erzakovıch kólik salasyn josparlaý Almaty úshin jańa pán emes ekenin aıtty. Alaıda ótken jyldardyń tájirıbesi kórsetkendeı, jıi rette kósheler men jańa jol aıyryqtardy salý, joldardy jóndeýden basqa barlyq sheshimder ekinshi-úshinshi orynǵa qoıylyp keledi, al bul is-sharalar qalanyń bas josparynda kórsetilgenimen, kóptegen jyldar boıy júzege asyrylmapty. «Sondaı-aq, mobıldilik basqarmasynyń qyzmetkerlerinde sheshimderdi qabyldaý kezinde kólik qozǵalysyn modeldeý nátıjelerin paıdalaný boıynsha daǵdylardyń joqtyǵy da úlken másele týdyryp otyr. Bul mamandar qandaı da bir jobalardyń tıimdiligin baǵalaýdyń ornyna, kóbinese kúndelikti shaǵymdarǵa mán beredi, ıaǵnı júıeli jumys júrgizýdiń ornyna jyrtyqty jamaýmen álek» dedi ol.
Gúlbarshyn SABAEVA,
«Egemen Qazaqstan»
