Elordadaǵy «QazMedıa ortalyǵynda» Qazaqstan Respýblıkasy Prezıdenti janyndaǵy Ortalyq kommýnıkasııalyq qyzmetiniń uıymdastyrýymen 26-27 tamyz kúnderi Shyǵys Qazaqstan oblysynda ótetin «Altaı – túrki áleminiń altyn besigi» atty II halyqaralyq forýmyna daıyndyq barysyna arnalǵan brıfıng bolyp ótti.
Elordadaǵy «QazMedıa ortalyǵynda» Qazaqstan Respýblıkasy Prezıdenti janyndaǵy Ortalyq kommýnıkasııalyq qyzmetiniń uıymdastyrýymen 26-27 tamyz kúnderi Shyǵys Qazaqstan oblysynda ótetin «Altaı – túrki áleminiń altyn besigi» atty II halyqaralyq forýmyna daıyndyq barysyna arnalǵan brıfıng bolyp ótti.
Túbi bir túrki jurtynyń basyn biriktiretin rýhanı qundylyqtardy túgel zerttep-zerdeleýdiń mańyzy zor. Máselen, «Qorqyt ata kitaby», «Manas», «Alpamys», «Kóruǵly», «Qozy Kórpesh-Baıan sulý», «Edige batyr», t.b. halyq aýyz ádebıeti eskertkishteriniń qazaq, qyrǵyz, ózbek, túrkimen, tatar, ázerbaıjan, túrik, bashqurt pen uıǵyr tilderindegi sıýjettik uqsastyqtary olardyń áý bastaǵy tarıhı tamyrynyń ortaq ekenin bildiredi, sondaı-aq túrkilerdiń dástúrli mýzykasyndaǵy sarqylmas sarynnan bir-birinen bólek alyp qaraýǵa bolmaıtyn tutastyqty, keı jaǵdaıda egiz qozydaı uqsas bolyp óriletin jarasymdy jalǵastyqty baıqaý qıyn emes.
«Halyq tarıh tolqynynda» baǵdarlamasy aıasynda alda ótetin «Altaı – túrki áleminiń altyn besigi» atty II halyqaralyq forýmy – Elbasymyz Nursultan Nazarbaevtyń bastamasymen qolǵa alynǵan «Mádenı mura» strategııalyq jobasy aıasynda baıyrǵy mýzykalyq murany baıyptaý, ony kópshilik qaýymnyń nazaryna usyný, túrkitildes halyqtyń ata-dástúr, salt-sana, ádet-ǵuryptary arqyly mádenıetimizdiń ejelden órkendep, damyǵandyǵyn maqtan etý, dástúrli mýzyka óneri ókilderin yntalandyrý, túrki halyqtarynyń áni men jyryn, kúıi men sazyn, epostyq úlgilerin jan-jaqty nasıhattaý maqsatynda ótkizilgeli otyr.
Birinshi forým 2011 jyly О́skemen qalasy jáne Katonqaraǵaı aýdanynda ótkizilip, ony aldaǵy ýaqytta dástúrli túrde eki jylda bir ret ótkizip turý týraly sheshim qabyldanǵan bolatyn. Bıylǵy forým Memlekettik hatshynyń ulttyq tarıhty modernızasııalaý jáne tarıhı zertteýlerge jańa tásilderdi paıdalaný týraly qoıǵan mindetteriniń aıasynda erekshe mańyzǵa ıe bolyp otyr.
Is-sharaǵa 20 eldiń ókilderi qatysady dep kútilýde. Altaıǵa Reseı, Japonııa, Tyva, Tatarstan, Qyrǵyzstan, Túrkııa, Hakasııa, Bashqurtstan, Altaı ólkesi, OAR, Túrkimenstan, Ázerbaıjan, Koreıa, t.b. elderdiń ǵalymdary, elshileri jáne qoǵam qaıratkerleri keledi.
Alǵashqy kúni keń kólemde ǵylymı-praktıkalyq konferensııa ótkizilmek. Kelesi kúni Katonqaraǵaı aýdanyndaǵy Berel aýylynyń «Patshalar alqabynda» ótetin mýzykalyq festıvalǵa Qazaqstan, Túrkııa, Iаkýtııa, Qyrǵyzstan, Reseı, О́zbekstan, Bashqurtstan, Ázerbaıjan jáne ózge memleket ókilderi qatysady. Teatrlandyrylǵan kóriniste qazaqy salt-dástúrleri kórsetilip, folklorlyq konsertter uıymdastyrylady.
Basqosý barysynda Shyǵys Qazaqstan oblysy ákiminiń orynbasary Jaqsylyq Omar, S.Amanjolov atyndaǵy Shyǵys Qazaqstan Memlekettik ýnıversıtetiniń birinshi prorektory Baýyrjan Erdembekov, osy oqý ornynyń Qazaqstan tarıhy kafedrasynyń professory Sovethan Igibaev pen tarıh ǵylymdarynyń kandıdaty Erlan Saılaýbaevtar forýmǵa daıyndyq barysy týraly aıta kelip, jýrnalıster tarapynan qoıylǵan suraqtarǵa jan-jaqty jaýap berdi.
Berik SADYR,
«Egemen Qazaqstan».
