Valıýtalyq jáne tolyqtyrýǵa bolatyn teńgelik salymdardyń mólsherlemeleri tómendetildi

QDKBQ bir jyl jáne odan joǵary merzimge arnalǵan, shetel valıýtasyndaǵy merzimdi jáne jınaq depozıtter boıynsha usynylǵan eń joǵary mólsherlemelerdi 1 paıyzǵa deıin tómendetti. Osylaısha qazirgi ýaqytta shetel valıýtasyndaǵy depozıtterdiń barlyq túrleri boıynsha mólsherlemeler birdeı deńgeıde belgilendi.

Bul shara 2020 jylǵy 15 naýryzda AQSh-tyń Federaldyq rezervtik júıesiniń negizgi mólsherlemesiniń tómendeýine jáne sonyń izinshe álemdik naryqtarda shetel valıýtasyndaǵy tabystylyqtardyń tómendep ketýine baılanysty qabyldandy.Bul óz kezeginde shetel valıýtasyndaǵy depozıtter boıynsha mólsherlemelerdi osy depozıtterge qatysty álemdik mólsherlemelermen teńdestirýge múmkindik beredi.

Sonymen qatar Qor tolyqtyrý quqyǵy bar, teńgedegi depozıtterdiń myna túrleri boıynsha usynylǵan eń joǵary mólsherlemelerdi:

• bir jáne eki jylǵa arnalǵan merzimdi depozıtter boıynsha tıisinshe 10,7% jáne 10,8%-ǵadeıin;
• 3 aı, 6 aı, bir jáne eki jylǵa arnalǵan jınaq depozıtter boıynsha tıisinshe 13,0%, 13,4%, 13,0% jáne 12,6%-ǵa deıin;
• merzimsiz depozıtter boıynsha 12,5%-ǵa deıin azaıtty.

QDKBQ-nyń eń joǵary mólsherlemelerdi belgileý ádistemesine sáıkes, tolyqtyrý quqyǵynyń quny memlekettik baǵaly qaǵazdardyń (MBQ)  tabystylyǵyna táýeldi. Qazaqstan Respýblıkasy Ulttyq Bankiniń bazalyq mólsherlemesiniń ulǵaıýy memlekettik baǵaly qaǵazdar tabystylyǵynyń ósýine yqpal etti. Bul rette MBQ tabystylyǵy tolyqtyrý quqyǵy qunynyń joǵary baǵalanýyna áser etip otyr. Ol óz kezeginde tolyqtyrylatyn depozıtter boıynsha eń joǵary mólsherlemelerdi azaıtady.

Merzimsiz depozıtterdi kez kelgen ýaqytta tolyqtyrýǵa jáne alýǵa bolatyndyqtan, olar boıynsha usynylǵan eń joǵary mólsherleme de qaıta qaraldy.

Bankter tolyqtyrý quqyǵy bar, valıýtalyq jáne teńgelik depozıtter boıynsha mólsherlemelerdi 2020 jyldyń 26 naýryzynan bastap ózgertýge quqyly. Bul rette jańartylǵan mólsherlemeler buryn ashylǵan depozıtterge taralmaıdy, tek jańa slymdarǵa ǵana tıesili.

ALMATY