Koronavırýs juqpasy Qytaıdan ári asyp, Eýropaǵa jetkende alǵashqy bolyp juqtyrǵan ataqtynyń biri – áıgili amerıkalyq akter, «Forrest Gamp» «Jasyl mıl», «Shoýshenkten qashý» syndy nebir biregeı fılmderdiń basty rólderin somdaǵan Tom Henks. Ol Avstralııaǵa belgili kınorejısser Baz Lýrmannyń Elvıs Preslı týraly fılminiń túsirilimine barǵan eken. Tom Henkspen ere kelgen áıeli de vırýsty juqtyrǵany belgili boldy. Qazir ekeýi de Avstralııanyń aýrýhanasynda em qabyldap jatyr.
Osydan bir aptadaı buryn álemdik aqparat quraldary «Chelsıdiń» shabýylshysy Kallým Hadson-Odoı da koronavırýs juqtyrǵanyn jarysa jazyp jatty. Aǵylshyn fýtbol klýbynyń múshesi ózinen sýyq tııý belgilerin baıqaǵan. Vırýsty anyqtaıtyn jedel test tapsyrǵan kezde onyń aǵzasynda vırýstyń bar ekeni anyqtalǵan. Qazir oıynshy ózin jaqsy sezinedi jáne jaqyn arada jattyǵý alańyna qaıta oralatynyna senimdi.
Indet quryǵyna alǵash ilikken fýtbolshy –Danıele Rýganı. Em alyp jatqan «Iýventýstyń» qorǵaýshysy Portýgalııadaǵy úıinde karantınge oqshaýlanǵan. Qazirgi tańda onyń boıynda eshqandaı vırýs belgileri joq. Kóńil-kúıi de, jaǵdaıy da qalypty. «Meniń densaýlyǵym úshin alańdaǵan barshańyzǵa alǵys aıtamyn. Ásirese, belgisiz aýrýmen kúndiz-túni kúresip, adamdardy aman alyp qalý úshin baryn salyp jatqan dárigerler men medbıkelerge rızashylyǵym sheksiz», dep jazdy fýtbolshy Instagramm paraqshasynda.
Koronavırýs bılik basynda júrgen shendilerdi de aınalyp ótpedi. Aýrýdyń taralýy jaǵynan alǵashqy bestikte turǵan Iranda qarapaıym adamdar ǵana emes, depýtattar, úkimet músheleri de vırýs juqtyrǵan. Keıin basqa elderdiń sheneýnikterinen de vırýs tabyla bastady. Mysaly, Amerıkanyń eki birdeı kongresmeni, Avstralııanyń ishki ister mınıstri, Fransııanyń mádenıet mınıstri, Polshanyń generaly,Kanada premer-mınıstriniń áıeli Sofı Gregýar Trıýda...
Qýanyshtysy, joǵaryda aty atalǵandardyń bári ózderin jaqsy sezinedi, syrqaty jeńil. Al olarmen jaqyn baılanysta bolǵandar oqshaýlanyp, karantın tártibinde jatyr.
Iá, aýrý ultqa bólinbeıdi, ataq pen shenińe qaramaıdy. Qazirgi indet adamzatqa belgisizdigimen qaýipti bolyp tur. Dúnıejúzi densaýlyq saqtaý uıymynyń ony pandemııa dep jarııalaýy da beker emes. Sondyqtan árkim ózine jaýapkershilikpen qarap, saqtanyp júrgeni abzal.
Qymbat TOQTAMURAT
