Premer-Mınıstr kásipkerlerdi salyqtan bosatatyn Qaýlyǵa qol qoıdy

Qazaqstan Respýblıkasy Úkimetiniń 2020 jylǵy 20 naýryzdaǵy №126 Qaýlysy

«Ekonomıkany turaqtandyrý jónindegi odan arǵy sharalar týraly» Qazaqstan Respýblıkasy Prezıdentiniń 2020 jylǵy 16 naýryzdaǵy №287 Jarlyǵyn iske asyrý jónindegi sharalar týraly

Qazaqstan Respýblıkasy Prezıdentiniń «Qazaqstan Respýblıkasynda tótenshe jaǵdaıdy engizý týraly» 2020 jylǵy 15 naýryzdaǵy № 285, «Áleýmettik-ekonomıkalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy № 286 jáne «Ekonomıkany turaqtandyrý jónindegi odan arǵy sharalar týraly» 2020 jylǵy 16 naýryzdaǵy №287 jarlyqtaryna sáıkes salyq-bıýdjet saıasatynyń máselelerin retteý maqsatynda Qazaqstan Respýblıkasynyń Úkimeti QAÝLY ETEDI:

1. Qosa berilip otyrǵan respýblıkalyq bıýdjetti qalyptastyrýdyń, naqtylaýdyń jáne atqarýdyń erekshe tártibi bekitilsin.
2. 2020 jylǵy 31 jeltoqsandy qosa alǵandaǵy kezeńde:

1. iri saýda obektileri, saýda-oıyn-saýyq ortalyqtary, kınozaldar, teatrlar, kórmeler men dene shynyqtyrý-saýyqtyrý jáne sport ǵımarattary boıynsha zańdy tulǵalar men dara kásipkerlerdiń múlik salyǵynyń;
2. aýyl sharýashylyǵy ónimin óndirýshilerdiń aýyl sharýashylyǵy maqsatyndaǵy jerleri boıynsha jer salyǵynyń;
3. salyq salýdyń jalpy belgilengen tártibimen jumys isteıtin dara kásipkerlerdiń jeke tabys salyǵynyń mólsherlemelerine «0» túzetý koeffısıenti engizilsin.

1. Mólsherlemelerge osy qaýlynyń 2-tarmaǵynda kórsetilgen «0» túzetý koeffısıentin qoldanǵan kezde salyq bazasyn, salyq salý obektilerin, salyq kezeńin jáne salyq mindettemelerin oryndaýdy aıqyndaý «Salyq jáne bıýdjetke tólenetin basqa da mindetti tólemder týraly» 2017 jylǵy
   25 jeltoqsandaǵy Qazaqstan Respýblıkasynyń Kodeksine (Salyq kodeksi) sáıkes júzege asyrylady.
2. Osy qaýlynyń 2-tarmaǵynyń 1) jáne 2) tarmaqshalarynda kórsetilgen salyq tóleýshiler úshin barlyq salyqtar boıynsha merziminde oryndalmaǵan salyq mindettemeleri boıynsha ósimpuldardy esepteý 2020 jylǵy 15 tamyzǵa deıin toqtatyla tursyn jáne salyq eseptiligin tapsyrý merzimi 2020 jylǵy 3-toqsanǵa aýystyrylsyn.
3. Qazaqstan Respýblıkasynyń Ulttyq ekonomıka mınıstrligi iri qara maldy jáne asyl tuqymdy balapandardy qosylǵan qun salyǵy esepke alý ádisimen tólenetin ımporttalatyn taýarlardyń tizbesine engizýdi qamtamasyz etsin.
4. Osy qaýly qol qoıylǵan kúninen bastap qoldanysqa engiziledi jáne resmı jarııalanýǵa tıis. 

Qazaqstan Respýblıkasynyń  Premer-Mınıstri

Asqar Mamın