Ákimshilik quqyq buzýshylyq pen qylmystyń aldyn alý, saqtandyrý jaǵdaılary boıynsha nátıjeli eńbek etýde. Qyzmet kórsetetin aýmaqta qoǵamdyq tártiptiń saqtalýyn qadaǵalap, jol erejesin buzǵandar men esik aldyna kúl qoqys tastaǵandardy, qoǵamdyq oryndarda temeki shekkender men ishimdik ishkenderdi tártipke keltiredi. Jastaıynan polısııa bolýdy armandaǵan Samat Jarqynbekuly aǵasyna qarap boı túzegen. Ishki ister salasynda qyzmet atqarǵan týysynan tálimin alyp, taǵylymyna qulaq asqan.
Mektepti bitirgen soń, Túrkistan qalasyndaǵy Q.A.Iаsaýı atyndaǵy HQTÝ-da «Zańger» mamandyǵyn meńgeredi. Eńbek jolyn ýchaskelik polısııa qyzmetkeriniń kómekshisi bolyp bastaǵan ol keıinnen ýchaskelik polısııa, aǵa ýchaskelik polısııa ınspektory laýazymdaryna joǵarylap, polısııa kapıtany shenin taqqan.
«Qoǵamdyq tártipti saqtaý men qoǵamdyq qaýipsizdikti qamtamasyz etý – basty maqsatym», dep biletin polısııa kapıtany qoǵamda nóldik tózimdiliktiń qatań saqtalýyn qadaǵalaıdy.
– Munda qoǵamdyq tártipsizdikke, qoqysty beı-bereket oryndarǵa tastaý áreketterine múldem tózbeý, ıaǵnı, azamattardyń ishki mádenıetin qalyptastyrý máselesi kózdeledi. Árbir adam qorshaǵan ortada qarapaıym erejelerdi saqtap, tártip pen mádenı turmysty birlese jaqsartýǵa úlken jaýapkershilikpen qaraýy kerek. Nóldik tózimdilik – taza ári qaýipsiz qalanyń kepildigi. Biz kópshilikten qarapaıym erejelerdi saqtaýdy suranamyz, – deıdi Samat Jarqynbekuly.
Polısııa kapıtany qazirgi kezde Túrkistanda páterde tirkeýsiz turýshylardyń kóptigin aıtady. Qurylys jumystaryna elimizdiń ár aımaǵynan kelgen jumysshylar qarapaıym erejeni saqtaýǵa qulyqsyzdyq tanytady eken. Zań negizinde arnaıy tirkelý kerektigin túsindiretin polıseı zańǵa baǵynbaǵandarǵa aıyppul salyp, ákimshilik hattama toltyrady. Bul árbir isti úlken jaýapkershilikpen atqaratyn S.Jarqynbekulynyń kúndelikti jumysy.
Osylaısha polısııa kapıtany bala kezinen armandaǵan súıikti qyzmetin abyroımen atqaryp keledi.
Qaırat Zaınıshev
