Aýmaǵy 2 myń sharshy metrden asatyn barlyq iri saýda ortalyqtary ýaqytsha qyzmetin toqtatty. Olardyń qatarynda «Rıo», «Kerýen», «Mechta» tárizdi saýda úıleri men «Shaıba» bazary, «Rýbın» saýda úıiniń ekinshi qabaty bar. Oblystyq kásipkerlik jáne ónerkásip basqarmasynyń basshysy Erbol Ospanov azyq-túlik satatyn nysandardyń qyzmeti qalypty jaǵdaıda jalǵasatynyn jetkizdi.
– Bizde azyq-túlik qory jetkilikti. Defısıt oryn almaıdy. Kásipkerlerdi negizsiz baǵany kóterip, turǵyndar arasynda alańdaýshylyq týdyrmaýǵa shaqyramyn, – deıdi oblystyq kásipkerlik jáne ónerkásip basqarmasynyń basshysy Erbol Ospanov.
Medısınalyq mekemeler karantınge jabylǵan. Qarııalar men múgedekterge arnalǵan tegin dári-dármek mekenjaı boıynsha jetkiziledi. 26 naýryzdan bastap balabaqshalar da jumysyn toqtatady. Qazirdiń ózinde mektepke deıingi bilim berý mekemelerinde balǵyndardyń tek 20 prosenti tálim alýda. Oblystyq taýarlar men kórsetiletin qyzmet sapasyn baqylaý departamentiniń jetekshisi Aınagúl Mýsına 20 naýryzdan bastap óńirdegi barlyq sanatorııler men kýrorttyq demalys oryndarynyń qyzmetin toqtatý týraly buıryqqa qol qoıdy.
– Pansıonattar, qonaqúıler men sanatorııler jumysyn toqtatty. Mundaı demalys mekemelerinde adamdar kóp shoǵyrlanady. Onyń ústine mundaı shara adamdardyń jol saparlaryn azaıtady degen oıdamyz. Ár óńirdiń bas sanıtarlyq dárigerinde mundaı sharalar qabyldaý quqyǵy bar. Mundaı sharalar indettiń taralýyna tosqaýyl bolady, – deıdi oblystyq taýarlar men kórsetiletin qyzmet sapasyn baqylaý departamentiniń jetekshisi Aınagúl Mýsına.
Adyn-ala joldama alǵan azamattardyń demalysy tótenshe jaǵdaı aıaqtalǵan soń uıymdastyrylady. Aqmolalyq taýar óndirýshiler óńir naryǵyn qamtamasyz etýdi basty maqsat etip otyr. Syrttan keletin ımport kólemi birqalypty. Mamandar óńir turǵyndaryn qaýipsizdik sharalaryn saqtaýǵa jáne jaýapkershilik tanytýǵa shaqyrady.
