«Tótenshe jaǵdaı kezinde aıyppuldar men ósimpuldardy esepteýge qabyldanǵan tyıym salýdan basqa, halyqtyń barlyq qaryzdary boıynsha negizgi borysh pen syıaqy somalaryn tóleýdi toqtata turý kerek. Bankterden túsinistik pen azamattyq yntymaqtastyqty kútemin», dedi Qasym-Jomart Toqaev.
Sondaı-aq ol banktik emes uıymdarda tártip ornatý mańyzdylyǵyn atap ótti.
«Qazirgi jaǵdaıǵa baılanysty kóptegen azamattar lombardtarǵa júginip, onlaın kredıtorlar men mıkroqarjy uıymdarynan kepilsiz nesıe alýy múmkin. Sondyqtan osy sektorda tártip ornatý óte mańyzdy. Azamattardy aldaý oryn almaýy qajet. Qarjy naryǵyn retteý men damytý jónindegi Agenttikke, Bas prokýratýraǵa, Aqparat jáne qoǵamdyq damý mınıstrligine zańnamanyń saqtalýyn tekserý jóninde aýqymdy aksııa ótkizýdi jáne zań buzýshylardy kórsetip, ony BAQ pen áleýmettik jelilerde keńinen jarııa etýdi tapsyramyn. Qazaqstandyqtar osynaý qıyn jaǵdaıda olardyń quqyqtaryn memleket qorǵaıtynyn bilýleri qajet», dedi Memleket basshysy.
