Qazaqstanda koronavırýstyń taralýyn baqylaý úshin qurylǵan Covid19live.kz tegin servısin otandyq ázirleýshiler daıyndaǵanyn buǵan deıin de baıandaǵan edik.
Spıkerdiń aıtýynsha, jańa servıs naqty ýaqyt rejıminde Qazaqstanda COVID-19 koronavırýsynyń taralý kartasyn baqylaýǵa, al eń bastysy – juqtyrý nemese juqtyrǵandarmen baılanysy týraly habarlaýǵa múmkindik beredi.
– Qosymshada koronavırýs juqtyrǵan adamdar anyqtalǵan núkteler kórsetilgen. Sol boıynsha almatylyqtar qalada aýyrǵan qansha adamnyń baryn jáne olardyń qaıda ekenin kóre alady, – deı kele, basqarma basshysy qazirdiń ózinde bul qosymshany 43 myń adam qoldanatynyn aıtty.
Servıs qazaq jáne orys tilderinde, sonymen qatar Android jáne iOS qondyrǵylaryna qosymsha jasalǵan.
Covid19live.kz bólimderi:
– Qazaqstan boıynsha koronavırýs taralýynyń onlaın kartasy;
– vırýstar men onyń taralýy, qorǵaný ádisteri jáne ózekti jańalyqtar;
– jedel ortalyqtar men aýrýhanalardyń meken-jaıy kórsetilgen biryńǵaı tereze.
Servıste qazaqstandyqtarmen keri baılanys úshin eki mańyzdy fýnksııa bar:
- «Men juqtyrdym»: COVID-19 tabylǵan paıdalanýshy ózi baılanysta bolǵan jáne juqtyrýy yqtımal adamdardy, sondaı-aq juqtyra otyryp, barǵan oryndardy atap, kórsete alady.
- «Men juqtyrǵandarmen baılanysta boldym»: eger juqtyrǵandarmen birdeı reıspen ushyp kelse nemese onyń qarym-qatynas sheńberinen bireý juqtyrǵanyna senimdi bolsa, paıdalanýshy pikir qaldyra alady.
ESKERTE ketetin jaǵdaı, osy fýnksııalardyń kómegimen alynǵan málimetter túgel jasyryn bolady jáne tek densaýlyq saqtaý organdarynyń qyzmetkerlerine ǵana qoljetimdi.
Alynǵan aqparatty paıdalana otyryp, mamandar koronavırýsqa kúdikti adamdarmen habarlasyp, kartada juqtyrý oshaǵyn belgileı alady, al azamattar sol qaýipti oshaqtardan ózin saqtaı alady.
Covid19live.kz qosymshasyn jasaýshylar barlyq qazaqstandyqtardy áleýmettik jaýapkershilikke shaqyra otyryp, Covid19live.kz servısin taratý monıtorıngi úshin ǵana emes, sonymen qatar quzyretti organdardy ýaqytyly habardar etý úshin de belsendi paıdalanýlaryn suraıdy.
Covid19live.kz servısi VLIFE jobasynyń baǵdarlamashylarymen Almaty ákimdiginiń, Densaýlyq saqtaý mınıstrliginiń jáne «Medıker Alataý» medısınalyq kompanııasynyń qoldaýymen quryldy.
