Tómende jarııalanyp otyrǵan Aqan seriniń óleńi ómiriniń sońynda bul dúnıeniń qyzyldy-jasyldy qyzyǵynan baz keship aıtqany. Oqyrmanǵa oı salatyn-aq dúnıe. Oraıy kelgende oqyp shyqqannyń artyǵy bolmas.
Assalaýmaǵaleıkým, Naýan aǵa!
Úı-ishi aman bolar bala-shaǵa.
Kórgen soń dıdaryńdy boıym sergip,
Qaldym ǵoı shyqqandaı bop Saharaǵa.
Jabyrqap jatyr edim adam kelmeı,
Kóp edi qadirlesim ózińizdeı.
Saýshylyq til men jaqtyń arqasy eken.
Kóp boldy qoıǵanyna bir jan kelmeı.
Túrimdi jatqan mynaý tursyz kórip,
О́lgende kim barady maǵan erip.
Engende jer qoınyna eki qulash,
Jatarmyn bolsa eken dep ıman serik.
Dosyna aıtqan deıdi Alla ózi,
Jetedi keleshekke kimniń kózi
Jatqanda aqyr jemde táýbá etse,
Pendemdi jarylqaımyn degen ózi.
Jatyrmyn osy sózden úmit etip,
О́kinem bosqa ketken ómirge ótip.
Qatamdy kesh, aldymnan uıaltpa dep,
Tileımin kóz jumǵansha ýaqyt jetip
Belgili jastyq shaǵym bárińe aıan.
Eteıin onyń nesin Sizge baıan.
О́terin dúnıeniń erte oılamaı,
Jatyrmyn ýaqytqa kep qysyltaıań.
Dúnıeni alshań basqan qaıran kúnim,
Jasaǵan berip edi óner-bilim.
Suraqtan súrindirmeı ótkizerme,
Saıraǵan bulbul qustaı qyzyl tilim.
Degenmen keledi tilim Rabbym Alla,
Muhammed paıǵambarym Rasýl Alla.
Jańylmaı qyryq paryzdan aman ótsem,
Bolar ed bitpes azyq uzaq jolǵa.
Synyq kóńil qaıǵy tartty júdep, aryp.
Jalǵannan kórdim qyzyq júrek jaryp.
О́zgeden tabıǵaty bólek shyǵyp,
Jaralǵan bul dúnıege men bir ǵarip.
Bireýdiń mal men basy dáýleti kóp.
Dáýletke sol jandardyń kóńili toq.
Qaıǵymen men jatyrmyn halim múshkil.
Kúńirenip úıde jalǵyz, joldasym joq.
Dúnıeniń áýresine jolyqqanda,
Jan shirkin, qaıǵy-dertke molyqqanda.
Jan joldas bolar ma edi jany ashıtyn,
Tánińnen qýat ketip toryqqanda.
Adamnyń bolsa eger jan joldasy,
Emes pe muńly ǵarip ǵazız basy.
Qaıǵysy, qasireti kimge batar,
Kól bolyp aqsa daǵy kózdiń jasy.
Halyqqa dáris aıtqan ımam ediń,
Namaz ben oraza qınap ediń.
Jolyna seriliktiń túsip ketip,
Qyzyǵyn sum dúnıeniń qımap edim.
Alladan minájat kóp tilekterim,
Ǵıbadat saýshylyqta bir etpedim.
Jatqanda kózim tiri, siz kelgende,
Qozǵaldy bári qopsyp júrekterim
Qudaı-aý meni Islam dininde qyl,
Idaıat paıǵambardyń jolynda qyl.
Bir Alla amanatyn bergen shaqta,
Tánimdi izilerdiń qolynda qyl.
Oń jaqqa taza arýlap salǵan shaqta,
Ornymdy sahılardyń úıinde qyl,
Ishinde qurǵaq jerde til qatysyp,
Solardyń qııamette sońynda qyl.
Keýdeden jan aýyryp taıǵanynda,
Isharat, ıman júzdi óńimde qyl.
Jalǵannyń maǵan etken tárbıesin,
Buıryqty shapaǵattyń jóninde qyl.
Eı, Alla bul tileýim qabyl alyp,
Saýabyn fánı jalǵan tatqandaı qyl.
El ketip jalǵyz ózim qalǵan shaqta,
Aq qanat perishteler kelgendeı qyl.
Jatyrmyn osylaısha kókten tilep,
Bolar dep aldym qandaı qorqyp júrek.
Armanda fánıdegi ókinbes em,
Jasaǵan baqı jaqtan berse tilek.
Qudaıdan qoryqqan adam jylaı berer.
Jalynyp jalbarynyp suraı berer
Ǵarasat maıdanyna aıdaǵanda,
Kim jaqsy, kim jamanyn qudaı biler.
Rızalyq aıtsaq sizge Naýan Haziret,
Fánıden baqı jaqqa túzeldi bet.
Muń aıtyp qııamettik kóńildi ashtym,
Oılap em Sizdi kórmeı ótem be dep.
Baqul bol, men baqulmyn, shyn nıetpen.
Almańyz kóńilińizge qatemdi ótken.
Paıdasyz jelikkendik jetegimen,
Bar shyǵar aıtqan sózim talaı óktem.
Bul taǵdyr qalar deısiń kimge kelmeı,
Dúnıege syıar ma adam tursa ólmeı.
O Alla, jarylqaǵyn musylmandy,
Bar shyǵar talaı muńlyq ótken mendeı.
Hal bile kóp rahmet kelgenińe,
Bas suǵyp, baspanama engenińe
Tarattym kóńildegi bar qusany,
Endi kóp ókinbeımin ólgenime.
Qorqynysh kóńilime jatyr enip,
Batpandap barǵan saıyn aýrý jeńip.
Ustańyz súıegimdi tiri otyrsań,
Shaqyrý habar kútpeı óziń kelip.
Al, endi osymenen demalaıyn,
Júrekten aıttym syrdyń birtalaıyn.
Baǵyshtap, atymdy atap, rýhyma
Duǵańnan tastamańyz juma saıyn.
Qosh taqsyr, shyn dúnıege túzeldi bet,
Etińiz Quran-qatym basyma kep
Duǵańyz qabyl bolar ınshalla,
Qol jaısa perishteler áýmın dep.
