Mańǵystaý oblysy qan ortalyǵynyń dırektory Rafael Sarsamalıevtyń aıtýynsha, qanǵa degen jáne onyń komponentterine suranys tómendegen joq, alaıda osylaı jalǵasa beretin bolsa, medısınalyq mekeme suranys berýshilerdiń ótinishin oryndaı almaýy ǵajap emes. Bul jaǵdaı tek Mańǵystaý óńirinde ǵana emes, jalpy respýblıka boıynsha sezile bastaǵan.
- Sol sebepti biz barlyq erikti donorlardy qan tapsyrýǵa shaqyramyz. Bizdiń ortalyqtyń esigi ashyq, al mamandarymyz bolsa betperde kıip júredi. Iаǵnı, qandaı da bir aýrýdy juqtyrý qaýpi joq dep sendire alamyz. Onyń ústine burynǵydaı halyq kóp kelýdi azaıtty. Al qan tapsyrýǵa nıet bildirgender bolsa, olarmen aldyn ala sóılesemiz, eger de jaqyn arada alys nemese jaqyn shet elderde bolǵandary bolsa, olardan múldem qan alynbaıdy, - deıdi ol.
Jalpy óńirde qan jáne onyń komponentterimen 14 medısınalyq uıym qamtamasyz etiledi. Olardyń ishindegi eń iri mekemeler qataryna oblystyq aýrýhana, kópbeıindi balalar aýrýhanasy, onkologııalyq dıspanser, oblystyq jáne qalalyq perınataldyq ortalyqtary, sonymen qatar qalalyq jáne aýdandyq aýrýhanalar bar.
О́z sózinde Rafael Sarsamalıev qan quıý eń aldymen jol-kólik oqıǵasynan, óndiristik nysandarynda jaraqat alǵandar, aýrýhanada túrli kúrdeli ota jasaǵanda, sonymen qatar perınataldyq ortalyqtarda bosanǵan áıelderge qajet ekendigin aıtady. Ásirese, onkologııalyq aýrýǵa tap bolǵan jandarǵa, onyń ishinde leıkoz jáne gemofılııaǵa shaldyqqandardyń ómirin uzartýǵa aýadaı qajet. Máselen, hımıoterapııadan soń naýqasqa trombosıt, erıtrosıt jáne beloktar qoryn tolyqtyrý úshin asa qajettiligi týyndaıdy.
- Árıne, jaǵdaı qatty qıyn deýden aýlaqpyn, al qan qory bolsa ázirge jetedi, alaıda qol qýsyryp qarap otyrýǵa taǵy bolmaıdy. Sol sebepti aldyn ala jumys isteı bergendi jón sanap otyrmyz. Máselen, kútpegen jerden tehnogendik jaǵdaı bolsa, barlyq mekemelerdi qanmen qamtamasyz ete almaýymyz múmkin. Al endi donorlyq adam densaýlyǵyna zııan ba, álde paıdaly ma degen suraqqa keletin bolsaq, qan tapsyrý adamnyń aǵzasyna óte paıdaly ekendigin taǵy bir eske sala ketken durys dep esepteımin. Sol sebepti úreı bolmasyn, kerisinshe adam boıyndaǵy qan aınalymy jaqsarady jáne densaýlyqqa eshqandaı zııany joq dep sendirgim keledi, - dep túsindiredi Rafal Sarsamalıev.
Aıta ketý kerek, qan ortalyǵy kóbine erikti donorlardy tartady. Keıbir óńirlerde aqyly túrde donorlyqqa tartý múlde joq. Memleket óz tarapynan qan, trambasıt jáne plazmaǵa tıisti mólsherde qarjy bólý máselesin qarastyrǵan.
Mańǵystaý oblysy
