Qazir oblys ortalyǵyndaǵy "Dalatex" tigin fabrıkasy №50 dárihanamen kelisimshartqa otyryp, kúnine 10 myń danadan asa betperde tigedi. Jekelegen kásipkerler "Ańsar" dárihanalar jelisin osy taýarmen qamtamasyz etip otyr.
Qorqyt ata atyndaǵy Qyzylorda memlekettik ýnıversıtetiniń oqytýshylary dezınfeksııa úshin paıdalanylatyn suıyqtyq ázirleýde. Tek óńirdegi etıl spırtiniń tapshylyǵy taýardy kóptep shyǵarýǵa kedergi bolyp otyr. Osyǵan baılanysty, Qýanyshbek Ysqaqov jaýapty sala jetekshilerine ónimdi 2 kún ishinde ózge aımaqtardan jetkizýdi mindettedi. Tek satylymǵa shyǵarylatyn taýar halyqqa qolaıly baǵada usynylýy tıistigin eskertti.
– Maska men antıseptıkterdiń baǵasyn sharyqtatyp, paıda kórý degen bolmasyn. Indet, daǵdarys degenimiz – ýaqytsha, ótpeli qubylys. Bizdiń aldymyzda turǵan maqsat – múmkindikti barynsha paıdalaný, osy qıyndyqtan aman-esen shyǵyp, odan da myqty bolý. Oǵan bizdiń tolyq múmkinshiligimiz bar, - dedi oblys ákimi.
QYZYLORDA
