Qoǵamdyq kóliktiń ishindegi kórneki tusta eskertpe aqparat ilinýi qajet. Júrgizýshiler de jeke basynyń tazalyǵyn saqtaýy shart. Keshe uıymdastyrylǵan kezekti reıd nátıjesinde qoǵamdyq kólikterdiń sanıtarlyq tazalyǵyna qatysty birqatar olqylyqtar anyqtaldy. Máselen, «Jaryq jol-1» seriktestigine qarasty №24 baǵyttaǵy avtobýstyń salony dezınfeksııalanbaǵan. Júrgizýshi de medmaska taqpaǵan, qolǵaby joq. Qostanaıda qoǵamdyq kólikke mingen jolaýshy jolaqysyn qolma-qol júrgizýshige ustatý arqyly esep aıyrysatynyn eskersek, bul jerde gıgıena týraly sóz qozǵaýdyń tipti qajeti bolmaı qalatyny túsinikti.
Sondaı-aq, salonda ınfeksııaǵa qarsy eskertpe aqparat ilinbegen. Kólik oryndyqtarynyń tysqaptary arnaıy dezınfeksııa quraldarymen tazartylmaǵan. Avtobýysta sanıtarlyq tazalyq saqtaýǵa qajet quraldar múlde bolmaı shyqty. Monıtorıngtik komıssııa músheleri júrgizýshige sanıtarlyq-epıdemııalyq saraptama júrgizý qajettigi týraly eskertpe qaǵaz qaldyrdy. Talap oryndalmaǵan jaǵdaıda ákimshilik hattama toltyrylyp, tasymaldaýshy kásiporynnyń basshysyna aıyppul salynady nemese 15 táýlikke deıin ákimshilik qamaýǵa alynady.
QOSTANAI
