Álemde beleń alǵan indet kezinde qaýipsizdikti kúsheıtý úshin Qazaqstan 28 elmen pochta baılanysyn toqtatty. Poshta arqyly alys-beris ýaqytsha múmkin bolmaıtyn elder mynalar: Aýstralııa, Aljır, Armenııa, AQSh, Ázerbaıdjan, Brazılııa, Grýzııa, Jańa Zelandııa, Izraıl, Indııa, Iran, Ispanııa, Kanada, Qatar, Qyrǵyzstan, Malaızııa, Moldova, Mońǵolııa, Ońtústik Koreıa, Norvegııa, BAÁ, Pákistan, Sıngapýr, Tájikstan, Túrkimenstan, Túrkııa, Ulybrıtanııa, Fılıppın.
Sonymen qatar «Qazposhta» AQ Basqarma tóraǵasy Sáken Sársenov feısbýkte karantın jarııalanǵan Nur-Sultan men Almaty qalalaryndaǵy poshta bólimshelerinde 2020 jyldyń 28-29 naýryzyn demalys kúni etý týraly sheshim qabyldaǵandaryn málimdedi.
– Basqa óńirlerdegi poshta bólimsheleri turaqty jumys kesteleri boıynsha jumys isteıdi. Almatydaǵy Bógenbaı batyr, 134 kóshesindegi qabyldaý núktesinen basqa, EMS kýrerlik qyzmetiniń barlyq bólimsheleri 2020 jyldyń 28 naýryzynda 9:00-den 16:00 saǵatqa deıin jumys isteıdi. 29 naýryz EMS kýrerlik qyzmeti úshin – demalys kúni, – dedi S.Sársenov.
Joǵaryda atalǵan eki qalada Qazposhtanyń 987 keńse qyzmetkeriniń 70,4%-y, ıaǵnı 695 adam qashyqtan jumys isteý rejımine aýystyryldy.
