1. Qýanyshbek Ysqaqov

Osy aptada Qyzylorda oblysynyń ákimi Qýanyshbek Ysqaqovtyń isti bolǵany týraly aqparat tarady. Ysqaqov 2019  jyly maýsym aıynda ǵana oblys ákimi bolyp taǵaıyndalǵan bolatyn. Aqparat quraldary taratqan derekterge sensek, Qyzylorda oblysynyń burynǵy ákimi ótken jyly Arys qalasynda bolǵan apatqa baılanysty jınalǵan «Syr meıirimi» qorynyń 80 mln teńgesin tórt qurylys kompanııasyna aýdarý arqyly qoldy qylǵan kórinedi. «Sybaılas jemqorlyqqa qarsy qyzmettiń keıbir derekkózderiniń aqparaty boıynsha, Qyzylorda oblysynyń ákimi Qýanyshbek Ysqaqov alaıaqtyq jasaǵany úshin ustaldy. Sonymen qatar, onyń orynbasary Marat Delmuhanov pen ákimine týys bolyp keletin eki kásipker – Jeńisbek Ysqaqov pen Azat Dosmaılov ustaldy» dep jazdy aqparat quraldary. Shynynda bul eki kásipker Qýanyshbek Dosmaıyluly Ysqaqovtyń jaqyn baýyrlary ekeni aty-jónderin-aq kórinip tur. Endi bul is qalaı órbıdi, qalaı aıaqtalady, osynaý aıyptaýlar dáleldene me, joq pa, ony ýaqyt kórsetedi. Biraq, osy aptada Qýanyshbek Ysqaqov qyzmetinen bosap, ornyna Májilis depýtaty Gúlshara Ábdiqalyqova taǵaıyndaldy. Ázirge elimizdiń Sybaılas jemqorlyqqa qarsy is-qımyl agenttigi Q. Ysqaqovqa baılanysty eshqandaı resmı málimdeme taratqan joq.

2. Elmıra Sýhanberdıeva

Bilim jáne ǵylym mınıstriniń burynǵy orynbasary Elmıra Sýhanberdıevanyń isi de jurtty biraz dúrliktirdi. Tergeý aqparattaryna qaraǵanda Elmıra Sýhanberdıeva men elordadaǵy №3 mektep gımnazııasynyń burynǵy dırektory Elena Shevernıaeva «Sentralnaıa» jekemenshik ekonomıkalyq mektebin ashqan. Sonyń saldarynan №3 mektep gımnazııasynda oryn azaıyp, basqa balalar oqýǵa qabyldanbaı qalǵan. Bylaısha aıtqanda, burynǵy vıse-mınıstr qolyndaǵy bıligin teris paıdalanǵan. Sóıtip, Sýhanberdıeva senimdi adamdary arqyly 2019 jyldyń basynda jekemenshik mekteptiń jumysyna aralasa bastaǵan kórinedi. Shevernıaeva vıse-mınıstrdiń qoldaý jasaıtynyn bilip «Sentralnaıa» mektebiniń uıymdastyrý formasyn aýystyryp, jaýapkershiligi shekteýli seriktestik retinde qurýdy usynady. Sýhanberdıeva atalǵan usynyspen kelisken. Osylaısha, ekeýi JShS-ny birge basqarýǵa, tabysty bólýge jáne ınvestısııany birlesip salýǵa ýaǵdalasqan. Sýhanberdıeva memlekettik qyzmetin paıdalanyp, jekemenshik mektepke qoldaý jasaýǵa kelisimin de bergen.

«Osylaısha, Sýhanberdıeva men Shevernıaeva JShS-nyń quryltaıshysy retinde ózderin emes, týǵan-týystaryn rásimdeýge ýaǵdalasqan. Sóıtip, jekemenshik fırmanyń quramyna Sýhanberdıevanyń týǵan apasy jáne Shevernıaevanyń anasy enedi. Budan bólek, ekeýi jekemenshik mekteptiń jańa ǵımaratyn alý úshin JShS esepshotyna 154 mıllıon 523 myń 400 teńge salǵan» deıdi bul jóninde prokýror Nurlan Bekmaǵambetov

Aıtpaqshy, Sýhanberdıeva tergeý ızolıatorynda jatqan 34 kúnde «Túrme vıse-mınıstrdiń kózimen» degen kitap jazyp shyqqanyn jarııa etken bolatyn.

«Tergeý ızolıatorynda ótkizgen 34 kúnde kitap jazdym. Ol jaqynda «Túrme vıse-mınıstrdiń kózimen» degen ataýmen jaryq kóredi. Bul áıelder túrmesi týraly jazylǵan alǵashqy kitap, onyń ishinde qanshama adamdar, qanshama pikirler bar. Munda tek men týraly ǵana jazylǵan joq, ol kitapta barlyǵy bar. Sondyqtan óte qyzyqty kitap bolady dep oılaımyn. Kitap jazýdy aıaqtap qaldym, tek keıbir ádebı túzetýler ǵana qaldy» dedi bul jóninde Elmıra Sýhanberdıeva. Tipti, burynǵy vıse-mınıstr ózine reseılik jáne sheteldik aqparat quraldarynan usynys túskenin, biraq, ol kitaptyń tusaýyn osy Qazaqstanda kesýdi uıǵarǵanyn da ashyq aıtqan edi. Biraq, bul kitaptyń keıingi taǵdyry belgisiz. Abaqtyda aı qarap jatpaı, tula boıyndaǵy ashý-yzasy men kórgen-baqqanynyń bárin qaǵazǵa túsirgen Sýhanberdıevanyń bul dúnıesi sol kúıi oqyrmanǵa jetpedi.

3. Bolat Baqaýov

Osy jyldyń basynda Pavlodar oblysynyń burynǵy ákimi Bolat Baqaýov ta jaqyndaryn jarylqaımyn basy daýǵa qaldy. Aqparat quraldarynda jazylǵan derekterge sensek, byltyr qyrkúıekte Pavlodar oblysy boıynsha Memlekettik kirister departamentiniń mamandary «AksuTransLogistic» JShS tekseredi. Onyń bir ǵana quryltaıshysy bar, ol - Baqaýovtyń baýyry. Kásiporynnyń 2014 jyldan 2018 jyldyń sońyna deıin salyqtardy qalaı tólegenin tekserip jatqanyn estigen oblys ákimi Memlekettik kirister departamentiniń mamandaryna jaǵdaıdan qulaǵdar etip otyrýdy buıyrǵan. Prokýrordyń sózine qaraǵanda, jyldyń sońynda Baqaýov týysqany 200 mıllıon teńgeden astam salyq tóleıtinin bilip, óz ókilettigin birneshe ret asyra paıdalanyp, tekseris qorytyndylaryn jasyryp, tóleıtin salyqty 3-5 mıllıon teńgege deıin tómendetýdi talap etken.

Qazir Bolat Baqaýov úı qamaqta otyr.

4. Asqar Esilov

Elordadaǵy Baıqońyr aýdanynyń ákimi qyzmetin atqarǵan Asqar Esilov te óz jaqyndaryna jaqsylyq jasaýdyń «qurbany» boldy. Eks-ákimniń telefon arqyly sóılesken áńgimelerin tyńdaý arqyly, ótken jyldyń qarasha aıynda Nurtazın degen jaqyn týysy oǵan 4 mln teńge jáne quny jarty mıllıon teńgeden asatyn «Aıfon 11» telefonyn syıǵa tartqany málim boldy. Osyndaı syı jasaý arqyly ákimniń týysqany kógaldandyrý isi boıynsha 72 mln teńgege jarııalanǵan tenderdiń jeńimpazy atanǵan. Keıin tekserý kezinde «Aıfon 11» telefony aýdan ákiminiń úıinen tabyldy. Nurtazın qymbat telefondy Esilovke «Esil» saýda úıinen satyp alyp bergen eken. Onyń kepildik qujattarynda Nurtazınnyń aty-jóni kórsetilgen.

Asqar Esilov óz kinásin birden moıyndap, sot oǵan 15 450 000 teńge, al Nurtazınge 7 725 000 teńge aıyppul saldy.